Búgin Shymkent qalasynyń ákimi Murat Áıtenov karantınge jabylǵan Abaı aýdanyndaǵy «Táýelsizdikke 20 jyl» turǵyn úı alabyna baryp, onda ornatylǵan baqylaý beketiniń jumysyn kórip qaıtty.
Shahar basshysy koronavırýstyq ınfeksııanyń taralýyna jol bermeý maqsatynda Abaı aýdanynyń ákimi Buharbaı Parmanovpen birge atalǵan turǵyn alabta túsindirme jumystaryn júrgizip, saqtyq sharalarymen tanysty. Qazirgi tańda mundaǵy jaǵdaı tolyq baqylaýda. Qala ákimi turǵyndarǵa kóshelerde negizsiz júrmeýdi, barynsha saqtyq sharalaryn ustanyp, betperde kııýdi eskertti.
Aıta ketsek, Shymkentte koronavırýs indetine qarsy belsendi kúres júrgizilýde. Osy maqsatta Shymkentte 2020 jyldyń 28-shi naýryzynda túngi saǵat 12:00-den bastap kelesi qosymsha shekteý sharalary engizilmek. Atap aıtsaq, Shymkent áýejaıynyń, temirjol vokzalynyń jumystary, avıa jáne temirjol qatynastary toqtatylyp, qaladaǵy qoǵamdyq kóliktiń jumysy saǵat 6:00-den 21:00-ge deıin shekteledi.
Qoǵamdyq tamaqtaný oryndarynyń qyzmeti saǵat 10:00-den 18:00-ge deıin shektelip, saǵat 18:00-den 22:00-ge deıin qoǵamdyq tamaqtaný oryndarynyń jumysy «taǵamdardy úıge jetkizý» rejıminde júzege asyrylady. Iri saýda ortalyqtaryndaǵy oıyn-saýyq aımaqtarynyń, sport keshenderiniń qyzmetteri ýaqytsha toqtatylmaq.
Shymkent