Avstralııanyń Densaýlyq saqtaý mınıstri Greg Hant elde juqtyrǵandar sanynyń ósý qarqynynyń tómendeýiniń alǵashqy belgileri tirkelgenin habarlady. Bul týraly vedomstvo basshysy jeksenbi kúni Kanberrada ótken brıfıngte málimdegen.
Hant ótken aptanyń ishinde syrqattanǵandar sanynyń ósý qarqyny kúnine 25-30% - ǵa jýyq bolsa, ótken táýlikte 13-15% - ǵa deıin tómendegenin atap ótti.
«Bul biz kútkennen de erterek belgili bolǵan oń nátıje, biraq bizde adamdardy oqshaýlaý jáne áleýmettik qashyqtyqty saqtaýdy qamtamasyz etý boıynsha jumystar kóp», - dedi Hant.
Sondaı-aq ol federaldy úkimettiń sońǵy eki aptada qabyldaǵan qatań shekteý sharalary nátıjesinde eldiń iri qalalaryndaǵy qozǵalys 80% - ǵa qysqarǵanyn, al oqýshylardyń shamamen 75% - y oqý oryndaryna barýdy toqtatqanyn aıtty.
Premer-mınıstr Skott Morrıson qazirgi ýaqytta Avstralııada 3 809 aýrý jaǵdaıy tirkelgen dep málimdedi. «Vırýs juqtyrǵandardyń 2 562-si shetelden kelgen adamdar», - dedi úkimet basshysy.
COVID-19 juqtyrýdyń alǵashqy oqıǵasy Avstralııada 25 qańtar kúni anyqtaldy. Búgingi kúni vırýsty juqtyrǵan 16 naýqas qaıtys boldy, al 242 adam saýyǵyp ketti. Aýrý juqtyrǵandardyń kópshiligi Sıdneı qalasynda tirkelgen, onda dárigerler 1 617 adamnyń dıagnozyn rastady.
Avstralııada qoǵamdyq tamaqtanatyn oryndar men oıyn-saýyq jáne saýda ortalyqtary, kınoteatrlar, sulýlyq salondary men sport zaldary, sondaı-aq murajaılar men basqa da baratyn mádenı ortalyqtar jabyldy. Azamattardy úıden jıi shyqpaı, 1,5 metr qashyqtyqty saqtaýǵa shaqyrdy. El azamattaryna sheteldik saıahattarǵa shyǵýǵa tyıym salynady.