Búgin Almaty qalalyq polısııa Departamentiniń bastyǵy, polısııa polkovnıgi Qanat Taımerdenov BAQ ókilderimen ótken onlaın-brıfıngte jýrnalısterdiń saýaldaryna jaýap bere otyryp, tómendegideı máselelerden kezekti ret qulaǵdar etti.
Almaty qalasynda karantındik rejımdi kúsheıtý jónindegi memlekettik komıssııanyń sheshiminiń oryndalýyn baqylaý úshin 28 naýryz kúni saǵat 00:00-den bastap polısııa Departamentimen, polısııa qyzmetkerleri jáne Ulttyq ulan sarbazdary qala kóshelerin kúzetýdi kúsheıtkeni belgili.
Osyǵan baılanysty jaıaý patrýldeý baǵyttary men patrýldik polısııa brıgadasy qaıta qaralyp, toptastyryldy. Qyzmet kórsetý mehanızmi jańartyldy. Negizgi nazar nasıhat jumystaryna baǵyttalady.
Degenmen, tótenshe jaǵdaı rejımin jáne shekteýdi qasaqana buzǵan jaǵdaıda, quqyq buzýshyǵa qatysty qylmysynyń aýyrlyǵyna baılanysty ákimshilik jáne qylmystyq sharalar qoldanylady. Bul sharalar eń aldymen qalada koronovırýstyq ınfeksııanyń taralý qaýpin azaıtýǵa jáne azamattardyń ómiri men densaýlyǵynyń qaýipsizdigine baǵyttalǵan.
Úıden tek azyq-túlik, dári-dármek satyp alý kezinde jáne medısınalyq mekemege jedel barý kezinde ǵana shyǵý usynylady.
Azamattardyń kóptep jınalýyna jol berilmeıdi, eger bul talaptar eskerilmese, quqyq buzýshylarǵa qatysty QR ÁQbK-niń 473 babyna (qoǵamdyq tártipti saqtaýǵa qatysatyn adamdardyń zańdy talabyna baǵynbaý) sáıkes jáne 476 bapqa (Tótenshe jaǵdaı rejımin buzý) sáıkes ákimshilik sharalar qoldanylady. Kóshede júrgen azamattardy, sonyń ishinde úı janýarlaryn serýendetip júrgenderdi, sondaı-aq, avtokólik quraldaryn, buryn buqaralyq aqparat quraldarynda jarııalanǵan qyzmetti júzege asyrýǵa ýákilettilik berilgen kásiporyndaryndardyń tizimine sáıkes jumys ornynan anyqtamanyń bolýyn tekseredi. Bul ruqsattar bolmaǵan jaǵdaıda quqyq buzýshylar polısııa basqarmasyna jetkiziledi jáne ákimshilik jaýapkershilikke tartylady.
– Osy maqsatta karantındik sharalardy kúsheıtý úshin qalada júris bóligin taryltý jáne shekteý belgilerin ornatý arqyly 26 post uıymdastyrylady. Tótenshe jaǵdaıdyń rejımin qasana buzatyn avtokólik ıeleri QR ÁQbK-niń 785 babyna sáıkes aıyppul turaǵyna jóneltiletin bolady. 65 jastan asqan azamattarǵa úıden nemese páterlerinen shyqpaý usynylady. Kóshede úlken adamnyń qaraýynsyz júrgen kámeletke tolmaǵandarǵa erekshe nazar aýdarylady. Eger mundaı kámeletke tolmaǵandar anyqtalsa, olardyń ata-analary nemese qamqorshylary QR ÁQbK-niń 476 babyna (Tótenshe jaǵdaı rejımin buzý) sáıkes ákimshilik jaýapkershilikke tartylady, – dedi Almaty qalalyq polısııa Departamentiniń bastyǵy Qanat Taımerdenov.
ALMATY