Shymkent qalasynda tótenshe jaǵdaı rejımin buzǵany jáne sanıtarlyq talaptardy oryndamaǵany úshin saýda jáne qyzmet kórsetý nysandaryna 287 ákimshilik hattama toltyrylyp, aıyppul salyndy.
Atap aıtqanda, sońǵy 5 kúnniń ózinde Abaı aýdanynda – 144, Eńbekshi aýdanynda – 58, Qarataý aýdanynda – 50 jáne Ál-Farabı aýdanynda 35 kásipkerlik nysany jaýapqa tartyldy. Onyń ishinde saýda ortalyqtary, azyq-túlik dúkenderi, dámhanalar, ásemdik salondary, lombardtar men avtokólikke tehnıkalyq qyzmet kórsetý ortalyqtary bar.
Aıta keteıik, tótenshe jaǵdaı kezinde saýda jáne qyzmet kórsetý nysandarynyń jumys ýaqyty shektelgen. Bul oryndardyń kire berisinde qoldy antıseptıkalyq óńdeıtin quraldar qoıylyp, kelýshilerdiń dene qyzýy kontaktisiz pırometrmen ólshenýi tıis. Sondaı-aq, qyzmet kórsetýshi personal men kelýshiler medısınalyq betperde taǵyp júrýge mindetti. Osy talaptardy oryndamaǵan kásipkerler aldaǵy ýaqytta da jaýapqa tartylady.