Prezıdentiniń «Áleýmettik-ekonomıkalyq turaqtylyqty qamtamasyz etý sharalary týraly» Jarlyǵyn oryndaý maqsatynda Energetıka mınıstrligi naýryzdyń 25-de kómirsýtekti jəne ýran shıkizatyn barlaý men óndirý baǵytynda paıdalanylatyn taýarlardy, jumystardy, sondaı-aq qyzmetterdi satyp alý erejesine ózgeris engizdi. Atalǵan sheshim otandyq jer qoınaýyn paıdalanýshylardy qoldaýǵa baǵyttalǵan. Bul týraly «Atameken» UKP habarlady
Osylaısha jer qoınaýyn paıdalanýshylar men olardyń merdigerleri CT-KZ sertıfıkaty nemese Indýstrııalyq sertıfıkatpen rastalǵan Qazaqstanda jasalǵan taýar, jumys jáne qyzmetterdi baıqaý ótkizbeı bir kózden satyp alýǵa quqyly. Bul ózgeris jaqyn kúnderi Energetıka mınıstrliginiń 25 naýryzdaǵy №110 buıryǵynyń jarııalanýynan keıin kúshine enedi. Dəl osyndaı jumysty Indýstrııa jáne ınfraqurylymdyq damý mınıstrligi qatty paıdaly qazbalar segmentinde júrgizip jatyr. Tıisti buıryq jaqyn arada qabyldanady dep kútilýde.