Álem elderi vırýsqa baılanysty úı karantıninde jatqan azamattardy qashyqtan qalaı baqylap jatqanyn buǵan deıin jazǵanbyz. Olardyń elektrondyq tapqyr júıesine tańdaıymyzdy da qaqqanbyz. Endi Nur-Sultan qalasy da vırýs juqtyrý qaýpi bar azamattardy baqylaýdyń smart júıesin iske qosty. Bul týraly Nur-Sultan qalasy ákiminiń orynbasary Málıka Bekturova habarlady.
Jańa júıeni koronavırýspen kúres IT-shtabynyń qoldaýymen elordalyq ákimdik pen Densaýlyq saqtaý mınıstrliginiń sıfrlandyrý keńsesi birge jasap shyǵarypty. Ony ózderi «koronavırýsqa baılanysty úı karantıninde otyrǵan azamattarmen sóılesýdiń jańa formaty» dep atapty.
Smart Astana mobıldik qosymshasynda ashylǵan qyzmettiń bul túrine vırýs juqtyrǵandarmen baılanysta bolǵan, qazir úı karantıninde jatqan barlyq azamat tirkelgen. Olardyń bireýi karantın aýmaǵynan uzaıtyn bolsa, telefondaǵy júıe belgi berip, azamattyń keri qaıtýyn eskertedi. Sondaı-aq, arasynda beıneqońyraýlar da iske qosylyp, karantındegi tulǵanyń úıde bar-joǵyn anyqtaıdy.
Budan bólek, Smart Astana mobıldik qosymshasynda taǵy bir jańa qyzmet iske qosyldy. Ol «Men Covid-19 taralýyna qarsymyn» dep atalady. Ony telefonǵa júkteý arqyly turǵyndar sıfrlyq baldar jınaqtaı alady. Upaıdy kóp jınaǵan qalanyń eń belsendi turǵyndary apta saıyn oınatylatyn utys oıynyna qatysyp, baǵaly syılyqtar utyp alýǵa múmkindigi bar.
Qymbat TOQTAMURAT