Bul kúnderi Almatyda epıdemııalyq jaǵdaı kún saıyn ózgerip otyr. Karantınge alynǵan indet oshaqtarynan shekteý sharalary alynyp jatqanyna qaramastan, olardyń qatary qaıta tolyǵyp jatyr.
Degenmen, bir jaıtqa nazar aýdarǵan jón. Almatyda koronavırýs juqtyrǵan turǵyndardyń 97 paıyzy syrttan juqtyryp kelgen. Bul týraly kezekti onlaın-brıfıngte qalalyq Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaqasymova habardar etti.
Almaty qalasynyń bas sanıtar dárigeriniń aıtýynsha, koronavırýsqa shaldyqqandardyń 3 paıyzy ǵana Qazaqstanda juqtyrǵan. «Osy ýaqyt aralyǵynda 13 naýryzdan bastap indettiń órshýi 3 ret baıqaldy.
5-shi kúni – táýligine 9 adam, 15-shi kúni – 16 adam, 18-shi kúni 10 adam tirkelgen. Taldaý nátıjelerine sáıkes 73 adamnyń 97 paıyzy syrttan juqtyryp kelgeni anyqtaldy. Basqa elden kelgen 26 adam kelesi kúni-aq 45 adamǵa juqtyrǵan. Almatyda juqtyrǵan 2 naýqastyń ǵana baılanysta bolǵan adamdary sanaýly», deıdi bas sanıtar.
Qalalyq bas sanıtar ınfeksııa kóbine qaı elderden kelgenin bylaısha jiktedi: «Aýyrǵandardyń 40%-y – Máskeýden, 23%-y – Berlın – Almaty reısimen, 20%-y – Sankt-Peterbýrg – Almaty reısimen, 17%-y Mınsk – Almaty reısimen kelgender».
Aızat Moldaqasymovanyń aıtýynsha aýyrǵandar jas ereksheligine qaraı toptastyrylǵan. Olardyń kópshiligi – 30-39 jas, odan keıingileri – 20-29 jas aralyǵynda, úshinshi topqa 50-59 jastaǵy adamdar kiredi. Almatyda koronavırýs juqtyrǵandardyń 62,5%-y – áıelder, 37,5%-y – erler.
– Búginge deıin Almatyda koronavırýs ınfeksııasyn juqtyrýdyń 73 jaǵdaıy tirkeldi, sonyń jeteýi saýyǵyp, úıine shyqty, – dedi onlaın-brıfıngte qalalyq Qoǵamdyq densaýlyq saqtaý basqarmasynyń basshysy Tileýhan Ábildaev.
Dúısenbi kúngi málimet boıynsha Qalalyq juqpaly aýrýlar stasıonarlarynda COVID-19-dan emdelip jatqan 66 pasıent bar. Jańadan anyqtalǵan 6 adamnyń tórteýi baılanysta bolǵandar, bir pasıent 19 naýryzda Mınsk-Almaty reısimen jáne bireýi osy kúni Ystanbul-Almaty reısimen ushyp keldi. Emdeýge jatqyzylǵandardyń ishinde 11 jastaǵy bala bar, qazir ol Qalalyq balalar juqpaly aýrýlar aýrýhanasynda ákesimen birge. 58 naýqastyń jaǵdaıy qanaǵattanarlyq, eresek naýqastyń jaǵdaıy aýyr, 6 eresek adam men 1 balanyń densaýlyǵy ortasha aýyr. Provızorlyq ortalyqtarda 1046 adam bar, onyń ishinde 102-si bala. Almatydaǵy provızorlyq ortalyqtar sany altyǵa deıin kóbeıgenin atap ótý qajet. Buǵan deıin 4 ortalyq boldy. Karantındik oqshaýlaý úshin 3 shıpajaı jáne bir jataqhana bólindi.
Qazir 419 azamat karantındik oqshaýlaýda jatyr. Bul shetelden kelgen adamdar. Olardyń barlyǵy qaı elden kelgenine qaramastan, eki kúndik karantınge ornalastyrylýda. Reısten túskennen keıin olardan birden COVID-19-ǵa taldaýlar alynýda. Nátıje teris bolǵan jaǵdaıda olar úılerine jiberiledi.
ALMATY