S.Asfendııarov atyndaǵy Qazaq ulttyq medısına ýnıversıtetiniń 7 kýrs stýdentteri karantın ortalyqtary men aımaqtarynda jumys istep júr. Bul týraly JOO-nyń resmı saıtynda jazylǵan.
Qazirgi tańda Almaty qalasyndaǵy karantın ortalyǵy men volonterler shtabynda atalǵan ýnıversıtettiń 50-den asa joǵary kýrs stýdentteri eńbek etedi. Karantın ortalyǵyna ár kúni 10 adam túsedi. Mundaı ortalyqtarǵa shetelderden ushyp kelgen barlyq jolaýshylar jetkiziledi. Bári qaýipti indetke test tapsyrady. 7 kýrs stýdentteriniń bıylǵy praktıkasy úlken táýekel men qaýip-qaterge toly bolyp tur. Internatýradaǵy stýdent-dáriger Nurıddın Tileýbek ýnıversıtetiniń jańa jataqhanasynda ornalasqan karantın ortalyǵynda jumys isteıdi.
– Erikti dáriger-stýdentter kún saıyn muqtaj azamattarǵa, jalǵyzilikti analarǵa, qart adamdar men múgedekterge medısınalyq kerek-jaraqtardy, qajetti zattardy, tamaq sebetterin jetkizýmen aınalysady. Sondaı-aq olar karantındik aımaqtardyń jumysyna belsendi qatysady, halyqaralyq reısterden kelgen adamdardyń tizimderin jasaıdy, blok beketterinde jumys isteıdi, temperatýrany ólsheıdi, – deıdi N.Tileýbek.
Elimizdiń jetekshi medısınalyq ýnıversıteti koronavırýsqa qarsy kúreste barlyq baǵytta kómek kórsetýdi qolǵa alǵan. Naýqastarmen jumys isteıtin jas mamandardan basqa, ýnıversıtet ózge qalalardan kelgen dárigerlerge ýaqytsha turý úshin eki jataqhana bóldi. Ýnıversıtet Covid-19-ǵa qarsy kúreste el basyndaǵy aýyr júkti jumyla kóterýdi jalǵastyrýǵa nıetti.
Stýdent-dárigerler men volonterler óz kezeginde karantın ortalyqtary, aımaqtarynda ǵana emes, qaladaǵy aýrýhanalardaǵy jumystarǵa da jumylǵan. Ýnıversıtet rektory Talǵat Nurǵojın stýdentterdiń mundaı qadamǵa óz erkimen barǵanyn aıtty.
– Rezıdentýra men ınternatýrada oqyp júrgen stýdentterimiz dárigerlerge kómektesýdi ózderi sheshti. Bul – olardyń úlken táýekeli. Shákirtterimizdiń sheshimi QazUMÝ-dyń medısına salasynda bilikti mamandardy tárbıeleıtinin taǵy bir ret dáleldedi. Adamdardy emdeý – jas mamandar úshin tek jumys qana emes, kásibı mindet pen azamattyq borysh, – dedi rektor.
Shetelderde, sondaı-aq elimizde de medısına qyzmetkerleriniń ózderi qaýipti ınfeksııany jutyryp, tipti álemdik tájirıbede keıbiriniń vırýstan ólip jatqanyn kóre tura osyndaı táýekelge barǵan stýdentterdiń isine sáttilik tileımiz!