Taratylǵan Naýryz Banktiń kepildi ótemdi tóleý merzimi aıaqtaldy

Depozıtterge mindetti kepildik berý týraly zańnamaǵa sáıkes, Qazaqstannyń depozıtterge kepildik berý qorynyń (QDKBQ, Qor) salymshylar aldyndaǵy mindettemeleri qatysýshy bankti májbúrlep taratý týraly málimetter Bıznes-sáıkestendirý nómirleriniń ulttyq tizilimine engizilgen kúnnen bastap bir jyl ótkennen keıin, biraq sot sheshimi zańdy kúshine engen kúnnen bastap kem degende bes jyldan keıin toqtatylady. Naýryz Bank týraly málimet Ulttyq tizilimge Qazaqstan Respýblıkasy Ádilet mınıstrliginiń 2019 jylǵy 28 naýryzdaǵy № 1265-r buıryǵymen engizildi.

Osylaısha 2020 jylǵy 30 naýryzda Naýryz Bank salymshylaryna kepildik berilgen ótemdi tóleý boıynsha QDKBQ mindettemeleriniń merzimi tolyǵymen ótti. Banktiń ótinish bergen barlyq 3 639 salymshysyna jalpy somasy 679,5 mln teńgege kepildik berilgen ótem tólendi. 2006 jyldyń 14 maýsymynan bastap «Naýryz Bank Qazaqstan» AQ salymshylary kepildik berilgen ótemdi alý úshin tikeleı Qorǵa júginý múmkindigine ıe boldy. Buǵan deıin agent bank qyzmetin atqarǵan «Bank Turan Álem» AQ salymshylarǵa tólemdi 2005 jyldyń 14 jeltoqsanynan beri tólep keldi. 

Qazirgi ýaqytta taratylyp jatqan «Valıýt-Tranzıt Bank» AQ, «Qazınvestbank» AQ, «Delta Bank» AQ, «Astana Banki» AQ, «Qazaq Banki» AQ jáne «Eksımbank Qazaqstan» AQ salymshylaryna QDKBQ atynan jáne qarajaty esebinen kepildik berilgen ótemderdi tóleý jalǵasyp jatyr.

Búginde Qor kepildigi teńgedegi merzimsiz jáne merzimdi salymdar boıynsha– 10 mıllıon teńgeden aspaıtyn, jınaq salymdar boıynsha – 15 mıllıon teńgeden aspaıtyn kólemde belgile­­­ngen.Eske sala ketelik, teńgelik depozıtter boıynsha kepildik berilgen eń joǵary soma birneshe ret qaıta qaralǵan. Mysaly, 2006 jyly memlekettik kepildik somasy 400 myń teńgeni, 2007 jyly – 700 myń teńgeni qurady. Al 2012 jyly memlekettik kepildik somasy 5 mln teńgege deıin, 2015 jyldyń sáýirinde 10 mln teńgege deıin ulǵaıtyldy. 

ALMATY