Qostanaı oblysynyń shalǵaıdaǵy shaǵyn eldi mekenderindegi shákirt sany 80-nen aspaıtyn oqý oshaqtary qashyqtan oqytýǵa kóshpeıtin boldy. Mundaı mektepterde qazir jalpy sany 7 jarym myńǵa jýyq oqýshy bilim alyp jatyr. Bastysy, qashyqtan oqytýǵa kóshpeıtin bilim mekemelerinde sanıtarlyq talap qatań saqtalatyn bolady. Balalar eki aýysymda oqıdy jáne ár sabaqtan keıin synyptar jeldetilip jáne dezınfeksııalaýdan ótedi. Aýysym arasyndaǵy úzilis kemi bir jarym saǵat bolady. Oqýshylar mindetti túrde medısınalyq masqa taǵýy tıis.
100 myńnan astam oqýshysy bar qalǵan 274 mektep qashyqtan oqıtyn bolady. Eger mektepte ınternet bolmaǵan jaǵdaıda, qashyqtan oqytý of-laın formatynda ótedi, ıaǵnı oqýshyǵa oqý materıaly men tapsyrma flesh-tasyǵysh arqyly belgilengen merzimge beriledi.
Bilim salasy qashyqtan oqytýǵa kóshýge qyzý daıyndyq ústinde. Barlyq mektepterde ár muǵalim men oqýshynyń múmkindikteri anyqtalyp jatyr. Bilim basqarmasyndaǵylardyń málimetinshe, qazir 4 myńǵa jýyq oqýshy kompıýterge muqtaj, 4,5 myńǵa jýyq oqýshynyń ınternet jelisine qosylý múmkindigi joq. Bul olqylyqtyń ornyn toltyrý maqsatynda múmkindigi joq muǵalimder men turmysy tómen oqýshylarǵa mektep menshigindegi 5 myńnan astam kompıýter taratylady. Kompıýter keıin qaıtarylýy tıis. Sonymen qatar, jergilikti bıýjetten qosymsha 1759 kompıýterge 300 mln teńge bólindi. Bul kompıýterler de balalarǵa ýaqytsha qoldanýǵa beriledi.
Qostanaı oblysy