Búginnen bastap Jambyl oblysynyń aýmaǵynda shekteý sharalary engizildi. Iri saýda oryndarynyń, kıim bazarlarynyń, meıramhana, monsha, shashtaraz sııaqty áleýmettik nysandardyń jumysy toqtatyldy. Oblys aýmaǵyna kiretin, shyǵatyn kólik qozǵalysy shekteldi.
Búgingi tańda oblystyń barlyq aýdandarynda saqtyq sharalary kúsheıtilýde. Halyqaralyq «Almaty-Tashkent» tasjolynyń boıynda ornalasqan T.Rysqulov aýdanynda halyq kóp shoǵyrlanǵan kóshelerde arnaıy daýys zoraıtqyshpen jurtshylyqqa úıden shyqpaý, oqshaýlaný talaptary, koronavırýs ınfeksııasynyń aldyn-alý sharalary týraly túsindirý jumystaryn júrgizýde. Koronavırýs ınfeksııasynyń aldyn alý sharalary aıasynda aýdanda 3 jerde blok-posttar jabdyqtalyp, tıisti mamandar táýliktik jumystaryn bastap ta ketti. Al, elimizdiń Almaty oblysy jáne kórshi Qyrǵyz Respýblıkasymen shektesetin Qordaı aýdanynda da búginnen bastap shekteý sharalary engizildi. Sol sııaqty elimizdiń Túrkistan oblysymen shektesetin Sarysý aýdanynda da kún saıyn shtab otyrysy ótkizilip, aty jaman indettiń aldyn alýǵa tıisti múmkindikter jasalýda. Túrkistan oblysyna shyǵa beriste ornalasqan Jaıylma aýylynyń tusyna sanıtarlyq beket ornatylǵan. Ákimdiktiń málimetinshe, onyń jumysy qatań baqylaýda. Sonymen qatar, aýdan boıynsha 8 meıramhana-toıhanalar jumysyn toqtatqan. Eriktilerdiń bastamasymen aýdan ortalyǵy Jańatas qalasy men aýyldyq okrýgterde 21 tigin sehy óz jumysyn bastap, halyqqa 3500-den astam medısınalyq maska taratylǵan. Al, elimizdiń Qaraǵandy oblysymen shektesetin Moıynqum aýdanynda dezınfeksııalyq jumystar júıeli júrgizilýde. Aýdan ortalyǵy Moıynqum aýylyndaǵy birqatar jerlerge koronavırýs indetinen saqtaný joldary týraly jazylǵan túsindirme jumystary ilingen. Sondaı-aq, aýdandaǵy meıramhanalar jabylǵan. Aıta keteıik, turǵyndardyń qaýipsizdigin qamtamasyz etý maqsatynda búginde Jambyl oblysy boıynsha 16 blok-beket jumys isteıdi.
Jambyl oblysy