Túrkistan oblysy boıynsha dezınfeksııa ortalyǵynda 109 maman bar. Ortalyq mamandary onlaın rejımde aýdandardaǵy zalalsyzdandyrý jumystarymen aınalysatyn qyzmetkerlerdi dezınfeksııa jumystarynyń nusqaýlyqtarymen tanystyrdy.
Dezınfeksııalyq quraldarmen jumys isteýge 18 jastan asqan azamattar jiberiledi. Tehnıkalyq quraldarmen jumys istegende jáne dezınfeksııalyq eritindini daıyndaý kezinde jeke bas qorǵanyshyn saqtaý úshin mindetti túrde arnaıy qorǵanys kıimin qoldaný qajet. «Dezınfeksııalyq is-sharalardy júrgizý aldynda mindetti túrde kórshilerge eskertý jasalyp, úıde naýqas nemese múgedek adamdar bolmaǵan jaǵdaıda júrgizedi. Sonymen qatar, úı egelerine zalalsyzdandyrý jumystarynan keıin belgili bir ýaqytta bólmelerge ylǵaldy tazalaý jumystaryn júrgizý, preparattyń jaǵymsyz ısi ketkenshe jeldetip kirý qajettigi eskertiledi» dedi ortalyq ókili Indıra Áýbákirova. Dezınfeksııalyq jumys barysynda temeki shegýge, tamaq ishýge, dezınfeksııalyq zattarmen birge tamaq ónimderin saqtaýǵa, tasymaldaýǵa qatań tyıym salynady. Jazataıym oqıǵalardy boldyrmaý úshin dezınfeksııalyq quraldardy ádistemelik nusqamasyna saı qoldaný qajet jáne qaraýsyz qaldyrýǵa nemese bireýge berýge bolmaıdy. Jumys oryndarynda qoldanylǵan qural-jabdyqtar da qaraýsyz qalmaýy tıis. Sondaı-aq onlaın tanystyrýda mamandar abaısyzda ýlanǵan jaǵdaıda qoldanylatyn sharalar jóninde tolyqqandy túsinikteme berdi.
Túrkistan oblysy