Qyrǵyzdyń mádenıeti men tiline qatty qumar máskeýlik 17 jasar Krıstına Parashına esimin «Aısulý» dep ózgertip, onysyn ata-anasyna bildirmeı, Islam dinin qabyldady. Bul týraly «Islam Today» aqparattyq portaly habarlady.
Krıstına qyrǵyz tilin 4 jyldan beri úırenip júr eken. Sondaı-aq, budan 2 jyl buryn Islam dinin qabyldaǵan. Ol munyń bárin júrek qalaýymen ári ózi qatty qyzyǵatyn Qyrǵyzstanǵa barý úshin júzege asyrǵan.
«Qyrǵyzstanǵa degen kózqarasym 4 jyldan beri qatty ózgerdi. Bul elge qyzyǵamyn, – deıdi Krıstına. – Qyrǵyzstan tarıhyn oqyp, tilin bilip qana qoımaı, sol elge barǵym keledi».
Krıstına óziniń kúrt ózgergenin bylaısha túsindiredi. «Máskeýde qyrǵyz balalarymen tanystym. Maǵan olardyń ózin-ózi ustaýy, adamdarmen qarym-qatynasy unady, – deıdi Krıstına. – Sodan olardyń eli men jeri týraly, sonymen birge, jaqsy tárbıeni qaıdan alǵanyn bilgim keldi».
«Osydan eki jyl buryn ata-anamnan jasyrynyp meshitke keldim de, Islam dinin qabyldadym, – deıdi Krıstına. – Sodan keıin ózimniń esimimdi Aısulý dep ózgerttim».
Krıstına aldaǵy ýaqytta óziniń armanyna aınalǵan Qyrǵyzstanǵa baryp, sondaǵy joǵary oqý oryndardyń birine túsýdi josparlap júr.
Máskeýlik arýdy tánti etip, tipti, ony dinin ózgertýge deıin jetkizgen Qyrǵyzstan Krıstına-Aısulý Parashınany jatyrqamas.
Joldybaı Bazarov.