Túrkistan oblysy aýmaǵynda koronavırýs ınfeksııasyn juqtyrǵandar sany beseýge jetti.
Keshe, ıaǵnı 31-naýryz kúni 1-pasıenttiń koronavırýs indetin juqtyrǵany tirkelgen bolatyn. Nur-Sultan qalasynan kelgen bul naýqaspen baılanysta bolǵan adamdardy tekserý barysynda, taǵy 3 otbasy múshesiniń saraptamasy oń nátıje berdi. Sonymen qatar, Almaty qalasynan kelgen 1 azamatta COVID-19 saraptamasy oń qorytyndy berdi. Túrkistan oblysy Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Nurbek Nyshanov qazirgi tańda naýqastar tolyq dárigerlerdiń baqylaýyna alynǵanyn, jaǵdaılary qanaǵattanarlyq dárejede ekenin habarlady. Qarym-qatynasta bolǵan barlyq adamǵa stasıonarlyq oqshaýlaý sharalary júrgizilgen. Tıisti hattamaǵa sáıkes, emdik sharalar jasalynýda.
Sondaı-aq dezınfeksııalyq qyzmet naýqas turǵan úı-jaılardy dezınfeksııalaý jáne sanıtarlyq óńdeý sharalaryn ótkizgen. 31-naýryzda koronavırýs ınfeksııasyn juqtyrǵan naýqas Jetisaı aýdandyq ortalyq aýrýhanasynda em alýda. Naýqaspen jaqyn qarym-qatynasta bolǵandardy anyqtaý jumysy jalǵasýda.
Aıta ketelik, oblysta 31 naýryzdaǵy jaǵdaı boıynsha Covid -19 koronavırýstyq ınfeksııadan qolaısyz elderden kelgen 495 adam monıtorıngtik baqylaýǵa alynǵan. Onyń ishinde 1 «a» sanatyndaǵy elderden kelgeni - 9 adam, 1 «b» sanatyndaǵy elderden kelgeni - 486 adam.
Infeksııa oshaǵynda tıisti departament, basqarma mamandarymen jáne oblystyq ınfeksıonıst dárigermen epıdemıologııalyq zerdeleý jumystary jáne indetke qarsy sharalar kesheni júrgizilýde.
Túrkistan oblysy