Kóktem mezgiliniń aýyl sharýashylyq salasyna tyń serpin beretini sózsiz. Mal tóldep, kóktemgi egis dala jumystarynyń qyzatyn kezi. Búginde oblys ortalyǵymen irgeles jatqan Baızaq aýdanynda asyrýshy sala alǵa basýda.
«Aspan agro» qojalyǵynyń jetekshisi Saha Manatovtyń aıtýynsha, sharýashylyqtyń 1500 gektar jeri bar eken. Onyń 600 gektary óziniń 200 bas múıizdi iri qarasyna arnalǵan jaıylym alqaby. Sondaı-aq, sharýa qojalyǵy óz jylyjaıynda kókónis ósirýmen aınalysýda. Qyzylsha, júgeri, bıdaı jáne alma ósirý isin de jolǵa qoıǵan. Sonymen qatar, «Aspan agro» memlekettik «Sybaǵa» baǵdarlamasynyń alǵashqy qatysýshylarynyń biri. Saha Manatov memlekettik qoldaý sharalarynyń tıimdiligin aıta kelip, lızıngke aýyl sharýashylyǵy tehnıkasyn jáne jyl saıyn qyzylsha ósirý úshin sýbsıdııaǵa qol jetkizip otyrǵanyn aıtty. «Búginde 110 gektar jerge qyzylsha otyrǵyzý jumystaryn bastap kettik. Kelisim-shart arqyly «Taraz» áleýmettik-kásipkerlik korporasııasy tuqymmen qamtamasyz etýde. Ol úshin tıisti qarjyny ónimdi jınaǵannan keıin qaıtaramyz» deıdi ol.
Alaıda, sharýashylyq basshysy Saha Manatov qyzylshasyn eshqaıda ótkize almaı qalam ba dep alańdaıtynyn da jasyrmady. Oǵan sebep bolǵan negizgi másele – qyzylsha ósirýshiler men «Merki» qant zaýyty arasyndaǵy máseleniń áli kúnge tolyq sheshilmegendigi. Jambyl oblysynyń ákimi Berdibek Saparbaev Baızaq aýdanyna jumys saparymen barǵanda basqa da tátti túbir ósirýshiler osy túıtkildi máseleni kóterdi. «Dıqandarǵa qant qyzylshasynyń egis alqabyn kemitýge bolmaıdy. «Merki» qant zaýytyna qatysty másele meniń jeke baqylaýymda. Zaýyt basshylyǵymen arnaıy keste jasaldy. Keste boıynsha olar óz bereshekterin tolyq tóleýge tıis. Sáýir aıynyń sońyna deıin bul másele sheshilýi kerek», dedi Berdibek Saparbaev.
Sondaı-aq, ákim sýbsıdııa kóleminiń ulǵaıǵany týraly da aıtqan edi. Bul jaǵymdy jańalyq baızaqtyqtarǵa jiger syılap, sharýalar endi qant qyzylshasyn ósirýdi belsendi túrde jalǵastyratyn boldy. Olar óz sózinde 250 sharýashylyqty qamtıtyn oblystyń qyzylsha ósirýshileriniń qaýymdastyǵy qurylatynyn jetkizdi. Al, Berdibek Saparbaev bolsa jınalǵandarǵa jańa qant zaýytynyń qurylysy boıynsha túrli nusqalardy qaraýdy usyndy. «Sizderdiń kez-kelgen usynystaryńyzdy qaraýǵa daıynbyz. Bul oraıda «Qarapaıym zattar ekonomıkasy» baǵdarlamasy boıynsha kórsetiletin qoldaýlardy paıdalanýǵa bolady», dedi ákim. Sonymen qatar, kezdesýde fermerler hımııalyq tyńaıtqyshtarǵa qol jetkizý ońaı emestigin jetkizdi. Olar tyńaıtqyshtardy kelisimshart arqyly jergilikti hımııalyq zaýyttardan alýǵa nıetti ekendikterin, al aqshany ónimdi ótkergennen keıin qaıtarǵysy keletindikterin aıtty. Berdibek Saparbaev bul máseleni qarastyrýǵa ýáde berdi. Taǵy bir aıta keterligi, óńirde aýyl sharýashylyq salasymen aınalysý úshin sý máselesi de sheshimin tabatyn boldy. Jýyrda ǵana oblys ákimi Qyrǵyz Respýblıkasynyń Premer-Mınıstrimen kezdesip, Shý men Talas ózenderi jáne memleket arasyndaǵy aǵyndy sý júıelerin bólý jaıyn talqylady. Osy oraıda sýarmaly alqaptar kólemi ulǵaıady dep kútilýde. Alaıda, ol úshin aldymen sý arnalaryn retke keltirý mańyzdy. Berdibek Saparbaev sý arnalaryn, drenajdyq júıeler men qurylystardy qaıta jańǵyrtý barysymen tanysty. Aýdanda «Túımekent», «Dóńsary», «О́tegen», «Uzyn» ishki sharýashylyq kanaldaryn qamtıtyn «Baızaq» magıstraldy kanaly bar. Búginde olardy tazalaýmen «Talas-Asa» sý sharýashylyǵy kásipornynyń bazasyndaǵy mehanıkalyq jasaq aınalysýda. Bóget salynyp, sý toraptary jóndelýde. Onyń jalpy smetalyq quny 700 mıllıon teńgeni quraıdy. Berdibek Saparbaev jobalaýshy men tehnıkalyq qadaǵalaýshylardyń jumysyna narazylyq bildirip, olar eskermegen kóp kemshilikterdi aıtty. «Keıin bóget jarylyp ketpes úshin, qazirgi qurylys jumystary sapaly atqarylý kerek. Sizder óte jaýapty ispen aınalysyp otyrsyzdar. Jumystyń bul kezeńinde eshkim baqylaýdy qamtamasyz etpeıdi, barlyǵy óz bilgenin isteıdi», dedi ákim. Berdibek Saparbaev bul máseleni zertteýdi oblystyq aýyl sharýashylyǵy basqarmasynyń basshysy Berik Nyǵmashevke tapsyrdy.
Jambyl oblysy