Parlament Senaty janyndaǵy Jergilikti ókildi organdarmen (máslıhattarmen) ózara is-qımyl jónindegi keńes tóraǵasynyń orynbasary Tóleýbek Muqashev elimizde tótenshe jaǵdaıdyń engizilýine baılanysty Úkimet qabyldaǵan qaýlylarǵa baılanysty barlyq deńgeıdegi máslıhat depýtattaryna úndeý joldady. Bul týraly Parlament Senatynyń baspasóz qyzmeti habarlady.
«Qymbatty áriptester, elimiz úshin qıyn-qystaý sátterde otandyq ekonomıkany turaqtandyrý, saılaýshylarymyzdy, jergilikti taýar óndirýshilerdi, jumys jáne qyzmet berýshilerdi qoldaý jónindegi memleket qabyldaǵan negizgi ustanymdar men sharalardy túsindirýde kúsh-jigerdi biriktirýdi ótinemin. Qazaqstan Respýblıkasy Prezıdentiniń 2020 jylǵy 15 naýryzdaǵy «Qazaqstan Respýblıkasynda tótenshe jaǵdaıdy engizý týraly» №285, 2020 jylǵy 16 naýryzdaǵy «Ekonomıkany turaqtandyrý jónindegi odan arǵy sharalar týraly» №287 Jarlyqtaryna sáıkes Úkimet salyq-bıýdjet saıasaty máselelerin retteýge, sondaı-aq memlekettik satyp alýdyń arnaıy tártibin aıqyndaýǵa baǵyttalǵan qaýlylar qabyldady», - dep atap ótti T. Muqashev.
Senator bul aktiler Qazaqstan Respýblıkasynda tótenshe jaǵdaı engizilgen kezeńde qabyldanǵanyn jáne jergilikti jerlerde túsindirý jumystaryn júrgizý talap etiletinin atap ótti. Úkimet aktileriniń mátinderi buqaralyq aqparat quraldarynda jarııalanǵan ári «Máslıhattarmen jumys» veb-portalynda ornalastyrylǵan.
«Elimizdiń Prezıdenti Q.K.Toqaev ortalyq jáne jergilikti basqarý organdaryna shaǵyn jáne orta bıznesti qoldaýdy, tuqym sebý naýqany kezeńinde aýyl sharýashylyǵy ónimderin óndirýshilerge járdemdesýdi tapsyrǵan bolatyn. Sizderdiń árqaısylaryńyz bul isten shet qalmaıtyndaryńyzǵa jáne belgilengen jospardy iske asyrýǵa óz úlesterińizdi qosatyndaryńyzǵa, sondaı-aq okrýgterdegi aǵa býyn ókilderine, zeınetkerlerge, kóp balaly otbasylarǵa jáne halyqtyń basqa da áleýmettik álsiz toptaryna jan-jaqty qoldaý, qaıyrymdylyq jáne materıaldyq kómek uıymdastyrýǵa járdemdesedi dep senemin», - dedi T.Muqashev.