Qazaqstannyń Ekologııa, geologııa jəne tabıǵı resýrstar mınıstri Maǵzum Myrzaǵalıev koronavırýs pandemııasy kezinde oqshaýlanǵan qazaqstandyq mektep oqýshylary úshin ekologııalyq taqyrypqa arnalǵan respýblıkalyq úzdik sýret jəne qoldan jasalǵan buıymdar konkýrsyn jarııalap otyr, dep habarlady osy mınıstrliktiń baspasóz qyzmeti.
«Qurmetti dostar, elimiz úshin de, barlyq əlem úshin de qıyn kezeńde aman qalý úshin balalarymyz úıde otyrýǵa məjbúr. Otbasy músheleri ýaqytyn bir shańyraq astynda ótkizýde. Biz osy sətti paıdalanyp, oqýshylar arasynda respýblıkalyq sýret jəne qoldan jasalǵan buıymdar konkýrsyn ótkizýdi jón dep sheshtik. Konkýrs «Tabıǵat pen ekologııany saqtaý», «Janýarlar dúnıesin saqtaý», «Qoqys suryptaý» nomınasııalary boıynsha ótpek», - dep jazdy mınıstr.
Ər nomınasııa boıynsha júldeli úsh oryn taǵaıyndaý josparlanǵan. Konkýrs bastaýysh, ortańǵy jəne joǵary synyptar arasynda ótkiziledi. Mınıstr jeńimpazdardy syılyqpen marapattaýǵa ýəde berdi.
«Sýret jəne qoldan jasalǵan buıymdardan basqa, qoqystardy bólektep jınaý taqyrybynda beınerolık túsirýge bolady. Úzdik rolık ıelerine de baǵaly syılyq beriledi», - dep atap ótti M.Myrzaǵalıev.
Barlyq jumystardy 2020 jylǵy 30 səýirge deıin TAƏ, qala/aýyl/eldi mekenniń, mekteptiń atyn, jas mólsheri men synybyn kórsete otyryp, #EsoQuarantine heshtegimen əleýmettik jelilerde jarııalaý nemese EcoQuarantine@gmail.com poshtasyna joldaý qajet.
Budan basqa, Ekologııa mınıstrligi basshysynyń derekteri boıynsha, oqshaýlaný uıǵarymy əreket etetin mezgilde eko-ambassadorlar tabıǵatty saqtaý taqyrybynda onlaın eko-saǵattar ótkizip, oqý-tanymdyq sabaqtar júrgizedi.
«Bul onlaın sabaqtardyń barlyǵyn Ekologııa mınıstrliginiń saıtynan jəne əleýmettik jelilerdegi paraqshalardan kóre alasyzdar. Osy mezgildi balalarmen birge utymdy ótkizýge, ózimiz úshin jańalyqtar ashyp, qyzyqty əserler alýǵa, tabıǵatty aıalap, oǵan zııan keltirmeýdi úırenýge shaqyramyn. Aman bolaıyq, dostar!», - deıdi M.Myrzaǵalıev.