Bul týraly Sybaılas jemqorlyqqa qarsy is-qımyl agenttiginiń Shymkent qalasy boıynsha departamenti basshysynyń birinshi orynbasary T. Serikbaev onlaın-brıfıngte habarlady.
Ol Departamenttiń aǵymdaǵy jyldyń birinshi toqsanyndaǵy jumys qorytyndysy men tótenshe jaǵdaı kezindegi organ qyzmetiniń formaty týraly baıandama jasady.
Spıkerdiń aıtýynsha, sybaılas jemqorlyqtyń aldyn alýdyń bir baǵyty memlekettik satyp alý monıtorıngi bolyp tabylady. Ol "Satyp alýdyń biryńǵaı terezesi" veb-portaly arqyly ótkiziledi.
Monıtorıngtiń negizgi maqsaty memlekettik satyp alýlardaǵy baǵany kóterý faktilerin anyqtaý, bıýdjet qarajatyn maqsatsyz paıdalanýdy jáne jymqyrýdy boldyrmaý bolyp tabylady.
«Aǵymdaǵy jyly biz bilim berý, tabıǵı resýrstar, ekonomıka, jumyspen qamtý, sondaı-aq Eńbek jáne halyqty áleýmettik qorǵaý salalaryndaǵy satyp alýlarǵa monıtorıng júrgizdik. Búgingi kúni bizdiń usynymdarymyz boıynsha 7 memlekettik organdardyń satyp alý baǵasy qaıta qaraldy» - dep atap ótti Talǵar Serikbaev.
Mysaly, «A.Asqarov atyndaǵy dendrologııalyq saıabaq» memlekettik kommýnaldyq qazynalyq kásiporynǵa jalpy somasy 57 mln.teńgege jylyjaı men metall konstrýksııalaryn satyp alý josparlanǵan bolatyn. Monıtorıng kezinde taýarlar qunynyń aıtarlyqtaı kótermelenýi anyqtalyp,engizilgen usynystardyń nátıjesinde atalǵan qarajat bıýdjetke qaıtaryldy.
Sonymen qatar, engizilgen usynymdardan keıin qalalyq ekonomıka jáne bıýdjettik josparlaý basqarmasy qymbat planshetterdi satyp alý boıynsha memlekettik satyp alý baǵasyn qaıta qarasa, Eńbek jáne halyqty áleýmettik qorǵaý departamenti kartrıdjderdiń satyp alý baǵasyn tómendetti. Únemdeý somasy 8 mln teńgeni qurady.
«Jalpy búgingi tańda únemdelgen bıýdjet qarajatynyń somasy 65 mln. teńgeni qurap otyr. Birqatar memlekettik satyp alý prosedýralary qaıta qaralýda, kútiletin únemdeletin qarjy shamamen 440 mln. teńgeni quraıdy.
Bıýdjet qarajatyn tıimdi paıdalaný, jymqyrýdy boldyrmaý bizdiń organnyń basym mindeti bolyp tabylady. Bul jumys turaqty negizde júzege asyrylatyn bolady» - dep tolyqtyrdy spıker.
Shymkent