Kúsheıtilgen karantın rejıminde Oral qalasynyń kúndelikti tirshiligin qamtamasyz etemiz degen ótinishpen bıznes ókilderi men kásiporyndar tarapynan sońǵy eki kúnde 350-deı ótinish túsken.
Tótenshe jaǵdaı jáne kúsheıtilgen karantın rejımine baılanysty qala ákimdiginde táýlik boıy jumys isteıtin operatıvti shtab qurylǵan bolatyn. Shtab qyzmeti aıasynda shahardaǵy ár túrli salalardy qamtıtyn shaǵyn jáne orta bıznes ókilderiniń suraqtaryna, qala turǵyndarynyń saýaldaryna jaýap berilýde.
- Ásirese, qalanyń tirshiligin qamtamasyz etemiz degen máselemen bıznes uıymdary men kásiporyndar tarapynan 31 naýryz kúni 190 ótinish tústi. Ol ótinishter qaralyp, 71 uıymǵa qyzmetin jalǵastyrýǵa ruqsat etildi, al 119 uıym men kásiporynnyń ótinishin oryndaýdan bas tarttyq, - deıdi Oral qalasy ákiminiń orynbasary Baqytjan Narymbetov.
Mundaı ótinishter áli túsip jatyr. Mysaly, 1 sáýir kúni keshki saǵat 17.00-ge 220 ótinish tústi. Jedel shtab ol ótinishtiń árqaısysyn qarastyryp, sheshim qabyldaıtyn bolady.
Baqytjan Haberulynyń aıtýynsha, sońǵy eki kún ishinde i-komek 109 call-ortalyǵyna turǵyndar tarapynan 3861 qońyraý shalynyp, ártúrli suraq qoıylǵan. Suraqtardyń kóbi jumys ornynan anyqtama berý, qyzmetin jalǵastyrý, 42500 teńge járdemaqy alý, t.b. máselelerdi qamtıdy. «Ol saýaldardyń árqaısysyna tolyq, qanaǵattandyrarlyq jaýap berildi» deıdi qala ákiminiń orynbasary.
Aıta keteıik, Batys Qazaqstan oblysynyń Bas memlekettik sanıtarlyq dárigeriniń qaýlysymen 31 naýryzdan bastap oblys aýmaǵynda koronavırýstyq ınfeksııanyń taralýyna jol bermeý jónindegi sharalardy kúsheıtý týraly qaýlysy kúshine endi. Osyǵan oraı Oral qalasyna eldimekenderden kólik quraldarynyń kirýine-shyǵýyna tyıym salyndy. О́te qajet bolmasa, qala boıynsha adamdar men jeke kóliktiń qozǵalysyna tyıym salynýda. Qala tirshiligin qamtamasyz etetin uıymdardan basqa barlyq mekeme-kásiporyndar jumysy ýaqytsha toqtatylýda. Qoǵamdyq kóliktiń jumys kestesi ózgertildi.
- Biz 31 naýryz ben 1 sáýir kúnderi turǵyndarǵa túsindirý jumystaryn júrgizip, eki kún keńshilik jasadyq. Endi erteńnen bastap ótkizý pýnktterinde talaptar qatań saqtalady. Syrtta júrýge ruqsat joq. Talapty oryndamaǵandar zańda kórsetilgendeı jaýapqa tartylady, - deıdi Baqytjan Narymbetov
Karantın kezinde júk tasymaldaryn júzege asyratyn avtokólik quraldary men tulǵalar Oral qalasyna eshqandaı shekteýsiz kirip-shyǵa alady. Sondaı-aq demalys kezinde aýylǵa ata-ájelerine qonaqqa baryp, qalyp qoıǵan qalalyq oqýshylardyń oblys ortalyǵyna qaıtyp kelýine eshqandaı shekteý joq.
Batys Qazaqstan