Ortalyq kommýnıkasııalar qyzmetiniń alańynda tótenshe jaǵdaı kezindegi eńbek qatynastaryn uıymdastyrýǵa baılanysty onlaın baspasóz máslıhaty ótti. Sharaǵa Eńbek jáne halyqty áleýmettik qorǵaý mınıstri Birjan Nurymbetov qatysty.
Jıyn barysynda mınıstr elimizde 42 500 teńgelik tólemdi alý úshin eshqandaı qujattyń qajeti joq ekenin aıtty.
«Biz jumys berýshilerdi jumys oryndaryn, jumysshylardyń jalaqysyn saqtaýǵa, qashyqtan jumys isteýge múmkindik berýge jáne aqyly eńbek demalysyna jiberýge shaqyrǵan bolatynbyz. Biraq ókinishke qaraı, kópshilik mekeme, ásirese orta jáne shaǵyn bıznes ókilderiniń bul talaptardy oryndaýǵa múmkindigi bolmaı otyr. Olar jumysshylaryn aqysyz demalysqa jiberýge, tipti qysqartýǵa májbúr. Onyń ústine elimizde óz betinshe jumys istep júrgen azamattar da tabysynan aıyrylýda. Elimizde statıstıka boıynsha ózin ózi jumyspen qamtyǵan 2 mln adam bar. Osyǵan baılanysty Prezıdenttiń 23 naýryzdaǵy tapsyrmasyna sáıkes tótenshe jaǵdaıda Memlekettik saqtandyrý qorynan tabysynan aıyrylǵan azamattarǵa 42 500 teńge áleýmettik tólem engizildi. Qazir 1 myńnan astam adam ony ala bastady», dedi B.Nurymbetov.
Mınıstrdiń málimetinshe, Memleket basshysy osy áleýmettik tólemdi alý máselesin jeńildetýdi tapsyrǵan.
«Osyǵan baılanysty tártipti ózgertýdemiz. Sonymen búgin Memlekettik saqtandyrý qorynan 42 500 teńgeni kim alady? Ol birinshiden jaldamaly qyzmetkerler – orta jáne shaǵyn kásiporyndarda aqysyz demalysqa jiberilgen jumysshylar. Karantın jarııalanǵan qalalarda bul sanatqa iri kásiporyndar da jatady. Ekinshisi – jeke tulǵalar, óz betinshe jumyspen qamtylǵandar. Olardyń ishinde jeke kásipkerler bar – 1,5 mln azamat. Jeke praktıkamen aınalysyp júrgen (jeke advokattar, sot oryndaýshylar, notarıýstar) 2 myńnan astam azamat, 180 myń frılanser bar. Olar da tabystarynan aıyrylýda. Sońǵy 12 aıda Biryńǵaı jıyntyq kólemin tólegen 316 myń adam bar», dedi ol.
Áleýmettik tólemdi alý úshin azamattarymyz ne isteýi kerek? Qaıda jáne qandaı qujat tapsyrý kerek?
«Birinshiden, endi eshqandaı qujatty tapsyrýdyń qajeti joq. Tek ótinish beriledi. Jumys berýshi óziniń ótinishinde jumysshylarynyń tizimin qosady. Bul jerde tabystan aıyrylǵannyń tótenshe jaǵdaıǵa baılanysty ekenin eshkimge dáleldeýdiń qajeti joq. О́tinishte kórsetilgen málimetter qabyldanady. Ekinshiden, bári elektrondy túrde bolady», dedi mınıstr.
Sonymen qatar ol tólemdi alýǵa bolatyn arnaıy saıttyń ashylatynyn málimdedi.
«42 500 teńgeni alý boıynsha halyqtan suraq kóp kelip jatyr. Egov.kz portalyna kóp adam kire almaıtynyn aıtýda. Sol úshin osy kúnge deıin kele jatqan egov.kz portalyndaǵy elektrondy ótinish servısinde ótinishińizdi toltyrýǵa múmkindik bar. Bul jerde faıldy tirkeý týraly talap alynyp tastalady. Elektrondy ótinishke tek qana ózińiz týraly málimetti, jeke nómirińiz ben kartochkalyq esepshotyńyzdy engizesiz», dedi B.Nurymbetov.
Mınıstrdiń aıtýynsha, ESQ-men qatar SMS arqyly parol alyp, óz qoltańbańyzdy qoıýǵa bolady.
«Elektrondy úkimet portalyna qazir kóp adam kire almaı jatyr. Sondyqtan Eńbek jáne halyqty áleýmettik qorǵaý mınıstrligi BTS kompanııasymen birlese otyryp, 42 500 teńgeni alýǵa arnalǵan arnaıy saıt ashamyz. Bul saıtta azamattar óz ótinish qaldyra alady. Saıt erteń iske qosylady», dedi ol.
Eńbek jáne halyqty áleýmettik qorǵaý mınıstri aı saıyn azyq-túlik toptamasyn alatyn azamattardyń sanatyn atady
«Memleket basshysy azyq-túlik toptamasyn alatyn azamattardyń sanatyn belgileý jóninde mindet júktedi. Azyq-túlik toptamasyn alý múmkindigi kimge beriledi? Ony ataýly áleýmettik kómek alyp júrgen otbasyndaǵy barlyq bala alady. Barlyq top boıynsha múgedekter (elimizde 695 myń) de, múgedek balany qarap otyrǵan ata-ana, resmı túrde tirkelgen jumyssyz adamdar da azyq-túlik toptamasyna ıe bolady. Qazaqstanda aıyna shamamen 1,5 mln adamǵa azyq-túlik toptamasy beriledi. Ony is júzine jergilikti ákimder iske asyrady», dedi B.Nurymbetov.