Eńbek jáne halyqty áleýmettik qorǵaý mınıstrligi Tótenshe jaǵdaı kezinde tabysynan aıyrylǵandarǵa Memlekettik áleýmettik saqtandyrý qorynan (MÁSQ) tólem alýǵa ótinish berý rásimin jeńildetý úshin arnaıy Telegram-botty iske qosty.
«EGov-ke («Elektrondyq úkimet» portaly) kirý úshin kompıýteri joq adamdar bar. Biz Telegram-bottaǵy jumystardy aıaqtap jáne tańerteńnen bastap uıaly telefon arqyly da ótinish berýdi usynamyz. Ol úshin qosymshany júktep alý qajet, óz derekterińizdi – TAÁ, JSN jáne banktik shotyńyzdyń nómirin engizip, «42 500 teńge tólem» qyzmetin tańdap, SMS-habarlama arqyly parol alyp, ony bekitý qajet. Iаǵnı, biz osylaısha bárin jeńildetemiz», dedi keshe Ortalyq kommýnıkasııalar qyzmetinde onlaın brıfıng ótkizgen Eńbek jáne halyqty áleýmettik qorǵaý mınıstri Birjan Nurymbetov.
Azamattardan áleýmettik tólemder alýǵa ótinish bergen kezde derekterdi jaýapkershilikpen toltyrýdy suraǵan mınıstr: «Eń birinshi, sizden málimetterińizdi durys toltyrýdy suraımyz. Bar bolǵany úsh baǵan: aty-jóni, JSN jáne karta shoty. Dos, tanys emes, ózińizdiń jeke shotyńyzdy kórsetý kerek. О́ıtkeni áleýmettik tólemdi taǵaıyndaýda sizdiń tegińiz kartochka ıesimen salystyrylatyn bolady», dedi.
Telegram-bot arqyly ótinish berýdiń joldary mynadaı:
О́tinish berýshi Telegram-ǵa kirip, «EgovKzBot2.0» izdep tabý kerek; «Tótenshe jaǵdaı kezinde 42 500 tóleý» qyzmetin tańdaıdy; О́tinish jazý úshin qajetti derekterdi toltyrady, óz derekterin kórsetedi. Sosyn ony jiberedi. О́tinish «Eńbek naryǵy» aqparattyq júıesine kelip túsedi, 1 kún ishinde derekter tekserýden ótedi (biryńǵaı jıyntyq tólemdi tóleýshilerdiń ótinishteri tekserýden ótpeıdi); Aqparat «Azamattarǵa arnalǵan úkimet» memlekettik korporasııasy» KEAQ-qa ótinishti óńdeý úshin «E-Maket» aqparattyq júıesine 1 kún ishinde túsedi; «Azamattarǵa arnalǵan úkimet» memlekettik korporasııasy» KEAQ járdemaqy taǵaıyndaý jáne tóleý úshin MÁSQ-ǵa ótinish jiberedi; Telegram-ǵa áleýmettik tólemniń taǵaıyndalýy týraly jaýap jiberiledi.Tólem ekinshi deńgeıdegi bankterdegi (EDB) tólem alýshynyń shotyna aýdarylady.
Aıta keteıik, tótenshe jaǵdaı kezinde tabysynan aıyrylǵandarǵa MÁSQ-tan aıyna 42 500 beriledi (eń tómengi jalaqy), ol myna sanattaǵy azamattarǵa taǵaıyndalady:
orta, shaǵyn jáne mıkrobıznes sýbektileriniń qyzmetkerleri; jeke kásipkerler (JK); jeke praktıkamen aınalysatyn adamdar (notarıýs, jeke sot oryndaýshysy, advokat, kásibı medıator) (JP); biryńǵaı jıyntyq tólemdi tóleýshiler (BJT); nysanasy jumystardy oryndaý (qyzmetter kórsetý) bolyp tabylatyn azamattyq-quqyqtyq sıpattaǵy sharttar (AQS) boıynsha tabys tabatyn, salyq agentteri olar úshin mindetti zeınetaqy jarnalaryn tóleıtin adamdar; karantın engizilgen eldi mekenderdegi iri bıznes sýbektileriniń qyzmetkerleri.