Búgin Jambyl oblystyq densaýlyq saqtaý basqarmasynyń basshysy Marat Jumanqulov óńirlik kommýnıkasııalar qyzmetiniń alańynda shuǵyl brıfıng ótkizip, óńirde koronavırýs indetin juqtyrǵan taǵy 2 adam anyqtalǵanyn jetkizdi.
Indetti juqtyrǵan Taraz qalasynyń 41 jastaǵy turǵyny «Qyzylorda-Kókshetaý» baǵytyndaǵy poıyzda Túrkistan oblysynyń turǵynymen baılanysta bolǵan. Búginde olarmen baılanysta bolǵan 8 adam karantın bólimshesine jatqyzylyp, koronavırýs ınfeksııasyna qan taldaýy alynǵan. Sonymen qatar «Qyzylorda-Kókshetaý» baǵytyndaǵy poıyzda Túrkistan oblysynyń atalǵan turǵynymen baılanysta bolǵan 7 jolaýshy karantınge jatqyzylǵan. Biraq olardyń qan taldaýy teris nátıje kórsetken.
Al, ekinshi naýqas 1991 jyly týǵan Jambyl oblysynyń turǵyny. Ol 30 naýryz kúni oblysqa Reseı Federasııasynan issaparmen kelgen. Atalǵan turǵyn kelgen sátinde-aq karantınge jatqyzylǵan. Onyń synamasy oń nátıje kórsetkennen keıin ınfeksııalyq stasıonarǵa aýystyrylǵan. Marat Jumanqulov tirkelgen 2 naýqastyń da jaǵdaıynyń qanaǵattarlyq ekenin atap ótti. Sondaı-aq hattamaǵa sáıkes ol azamattar qajetti em alyp jatyr eken. Sonymen qatar Marat Jumanqulov sanıtarlyq-epıdemııalyq qyzmetter naýqastardyń turǵan jerleri men bolǵan oryndaryndaǵy oshaqtarda dezınfeksııa jumystary júrgizilgenin de aıtty. Búginde oblysta 165 adam stasıonarlyq karantınde bolsa, 533 tulǵa úı karantıninde.
Osy ýaqytqa deıin Jambyl oblysynda koronavırýs ınfeksııasyn juqtyrý boıynsha 3 jaǵdaı tirkelgen bolatyn. Indet belgileri Qyrǵyz Respýblıkasynan kelgen Shý jáne Qordaı aýdanynyń turǵyndarynan anyqtalǵan edi.
Jambyl oblysy