О́kinishke qaraı, Qaraǵandyda taǵy da alty adamda koronavırýs belgileriniń bar ekendigi anyqtaldy. Olardyń úsheýi kúni keshe qaıtys bolǵan qaraǵandylyq turǵynnyń otbasy músheleri bolyp shyqty.
Jalpy, kornoavırýs dertinen qaıtys bolǵan naýqastyń 204 adammen qandaı da bir baılanysta bolǵany anyqtalyp otyr. Bulardyń ishindegi 54-i provızorlyq jáne karantındik stasıonarlarǵa, al 150-i úı jaǵdaıyndaǵy karantınge jatqyzyldy.
Joǵaryda aıtylǵan alty adamnyń úsheýi marqumnyń týystary bolsa, taǵy eki naýqas karantındik stasıonarda bolǵan emdelýshiler arasynan shyqty. Al 6-shy naýqas úı karantıninde jatqan turǵyn eken. Qazirgi ýaqytta bul adamnyń kimdermen aralasqanyn anyqtaý jumystary júrgizilýde.
Jalpy, búgingi kúnde Qaraǵandy oblysynda barlyǵy 627 adam táýlik boıy baqylaýǵa alynǵan. Bul 1A jáne 1B sanatyndaǵy, ıaǵnı indet órship turǵan elderden oralǵan nemese juqtyrǵan adamdarmen shartty túrde baılanysta bolǵan azamattar. Úı karantıninde jatqandardyń da sany artyp keledi: qazir olar 1087 adam boldy.
Al Qaraǵandyda koronavırýs ınfeksııasyn juqtyrǵan naýqastardyń sany 21 adamǵa jetti. Onyń ishinde bireýi keshe ómirden ótti.