Úkimetiniń selektorlyq otyrysynda Eńbek jáne halyqty áleýmettik qorǵaý mınıstri B. Nurymbetov halyqty jumyspen qamtý sharalary týraly baıandady. Bul týraly primeminister.kz habarlady.
Onyń aıtýynsha, halyqty jumyspen qamtýdyń negizgi quraly Jumyspen qamtýdyń jańa jol kartasy bolady. Ony iske asyrýǵa 1 trln tg qarastyrylǵan. Baǵdarlamada 7 myńnan astam joba qamtylatyn bolady. Olardyń 300-den astamy jańa turaqty jumys oryndaryn qurýǵa múmkindik beretin óndiristik, perspektıvaly jobalar.
«Jumysshylardyń eńbekaqysy 85 myń teńgeden tómen emes 242 myń jumys orny ashylady. Jol kartasynyń talaptary men sharttary boıynsha keminde 90% otandyq jumyskerler bolýy tıis. Jumysqa tartylǵan qyzmetkerlerdiń keminde jartysy jumyssyz jastarǵa basa nazar aýdara otyryp, halyqty jumyspen qamtý ortalyqtary arqyly tartylýy tıis», — dedi eńbek jáne halyqty áleýmettik qorǵaý mınıstri.
El Prezıdentiniń tapsyrmasy boıynsha iri qalalarda jumys istegen jáne búgingi kúni jumyssyz qalyp otyrǵan óńirlerdegi jastar Jol kartasynyń jobalaryna qatysa alady. Olarǵa 85 myń teńge kóleminde kóterme aqy tólenedi. Bul úshin jergilikti atqarýshy organdar mobıldi pýnktter quryp, olardy jumysqa tartý jóninde sharalar qabyldaýy tıis.
«Búgingi tańda ákimdikter jumyssyzdardy qabyldaý kezinde jergilikti jumyspen qamtý ortalyqtarynyń elektrondyq júıelerin tolyqqandy paıdalanýdy qamtamasyz etýi tıis. Jol kartasy aıasynda júzege asyrylatyn jobalardyń 35%-y áleýmettik sala nysandaryna, 34%-y ınjenerlik-kólik ınfraqurylymyn jańǵyrtýǵa, 14%-y turǵyn úı-kommýnaldyq máselelerdi sheshýge, 17%-y eldi mekenderdi abattandyrýǵa baǵyttalǵan», — dedi B. Nurymbetov.
О́ńirler bólinisinde 62-den 1695-ke deıin joba usynyldy, olardyń 12%-y — iri óndiristik jobalar.
«Endi ákimder halyqty jumysqa barynsha tartyp, atalǵan jobalardy sapaly ári ýaqytyly júzege asyrýy kerek. Jumyspen qamtý boıynsha “Eńbek” baǵdarlamasy da iske asyrylýda. Bul baǵdarlamany júzege asyrýǵa qosymsha 50 mlrd teńge bólinip, qosymsha 136 myń jumys orny ashylady», — dedi B. Nurymbetov.
Jalpy, Jumyspen qamtýdyń jol kartasy bıyl 600 myńnan astam adamdy jumyspen qamtamasyz etedi degen boljam bar.
Sonymen qatar, Memleket basshysynyń tapsyrmasy boıynsha TJ rejımi kezeńinde elimizde óz tabystarynan aıyrylǵan tulǵalarǵa MÁSQ qorynan 42 500 teńge mólsherinde áleýmettik tólem engizildi. Bul tólemderdi resmı ózin-ózi jumyspen qamtyǵandar da, beıresmı túrde jumys isteıtinder de ala alady. Resmı emes jumys isteıtin ózin-ózi jumyspen qamtyǵan azamattardy eskere otyryp, 3 mln-ǵa deıin jumysker qamtylýy múmkin, jalpy tólemge bólinetin qarajat aıyna 127,5 mlrd teńgeni quraıdy.