Búgin tústen keıin qala ákimdiginiń baspasóz ortalyǵynda Almaty qalasy ákiminiń birinshi orynbasary Erlan Qojaǵapanovtyń qatysýymen onlaın brıfıng ótti.
Qojaǵapanov turǵyndardan eń jıi kelip túsetin suraqtarǵa jaýap berdi. Máselen, karantın rejıminiń kúsheıtilýine baılanysty, almatylyqtar kúndelikti eń qajetti zattardy jaıaý baratyn jerden ǵana alyp kelýge tıis. Sol sııaqty kólik qozǵalysy da shektelgen. Alaıda, Almatyda qartaıǵan áke-sheshesinen bólek turatyndar barshylyq eken. Sondyqtan da qart kisilerge tamaq, dári-dármek aparyp berý, kúndelikti qajet zattarmen qamtamasyz etý máselesi bar.
Qysqasy, almatylyqtar «Qalanyń basqa aımaǵynda turatyn qart týystarǵa kómektesýge bola ma?» degen suraqty jıi qoıady.
Qala ákiminiń birinshi orynbasary mundaı jaǵdaılarda azamattarǵa qart jáne kútimdi qajet etetin týystaryn karantın ýaqytynda óz úıine kóshirýdi usyndy. Qazir egde jastaǵy adamdar erekshe qorǵaýdy qajet etedi. О́ıtkeni, olardyń ımmýnıteti álsiz.
«Sondyqtan qajet nárseniń bárin satyp alyp, karantın sońyna deıin qart adamdardyń janynda bolý kerek, olardyń basqalarmen baılanysyn azaıtqan durys. Eger bul múmkin bolmasa, qalada muqtaj adamdarǵa kómek kórsetetin eriktiler shtaby jumys isteıdi. Eriktiler shtabynyń telefony – 279-16-91», – dedi qala ákiminiń birinshi orynbasary.
«Adamdar úıden qanshalyqty alys ketkenin qalaı anyqtaıdy? Sebebi kóp adamdar tirkelgen meken-jaıda turmaıdy ǵoı» degen saýalǵa: «Sizdiń turatyn jerińiz ben qozǵalatyn jerińiz arasyndaǵy qashyqtyq elektrondy karta jáne qala turǵyndary keńinen paıdalanatyn qosymshalar arqyly ólshenedi. Tirkeýge keler bolsaq, siz qazirgi tańda naqty turatyn jerińizge onlaın rejıminde ýaqytsha tirkele alasyz», – dep jaýap berdi Erlan Toqtarhanuly.