Qazaqstannyń Germanııadaǵy bas konsýly qamaýǵa alyndy

Qazaqstannyń Syrtqy ister mınıstrligi elimizdiń Germanııadaǵy bas konsýly Ahat Alpysbaevtyń Maındaǵy Frankfýrtta qamaýǵa alynǵanyn rastady. Bul týraly Tengrinews.kz tilshisi habarlady. «Biz bas konsýldyq qyzmetkerleriniń Frankfýrtta ustalǵan deregin rastaımyz. Men Qazaqstan men Germanııanyń qylmyspen jáne kontrabandamen kúres sekildi salalardy da qamtıtyn keń aýqymdy áriptestik boıynsha jumys jasasyp kele jatqanyn atap ótkim keledi. Dál qazir oryn alǵan jaǵdaı boıynsha da sondaı jumystar jasaldy», - dedi Syrtqy ister mınıstrliginiń resmı ókili Janbolat Úsenov.

Ol «atalmysh másele boıynsha tártiptik sharaǵa deıingi barlyq sheshim jaǵdaı túbegeıli tekserilip bolǵannan keıin qabyldanatynyn» aıtty.

Budan buryn basylym nemistiń Bild basylymynyń deregine súıene otyryp, Alpysbaevtyń sıgaret kontrabandasyn uıymdastyrǵany úshin qamaýǵa alynǵanyn jazǵan bolatyn. Bas konsýlmen birge onyń kómekshisi de ustaldy. Bild basylymynyń derekteri boıynsha, kedenniń jedel qımyl qyzmetkerleri dıplomattyń is-áreketterin birneshe aptadan beri teksergen eken. Al 29 tamyz kúni qamaýǵa alýǵa order berilgen.

Ázirge Germanııadaǵy prokýratýranyń da, kedenniń de tergeýshileri kontrabandaǵa baılanysty janjal jóninde túsindirme berip jatqan joq.

Sultan Bozaıǵyr.