Batys Qazaqstan oblysyna Reseıdiń Samara qalasynan oralǵan 57 stýdenttiń smartfondaryna «GeoStatus» mobıldik qosymshasy ornatylyp, baqylaýǵa alyndy.
- 30 naýryzda Samara qalasynan 57 stýdent kelgen bolatyn, olardyń smartfondaryna «GeoStatus» mobıldik qosymshasyn ornattyq, bul qosymsha karantın rejıminiń buzylýy múmkin jaǵdaılardy qospaǵanda, ózin ózi oqshaýlaý oryndaryna turyp, usynymdardy taratýdy jáne olardyń jaı-kúıi men ornalasqan jerin monıtorıng jasaýǵa, jedel medısınalyq kómek kórsetýge múmkindik beredi, - deıdi Batys Qazaqstan oblystyq Tótenshe jaǵdaılar Departamenti bastyǵynyń orynbasary, podpolkovnık Aqylbek Ahmetjanov.
Aıta keteıik, 29 naýryzda Batys Qazaqstan oblysynda 2 adam koronavırýstyq ınfeksııasyn juqtyrǵany belgili bolǵan edi. Batys Qazaqstan oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń aıtýynsha, oblystyq juqpaly aýrýlar aýrýhanasynda qajetti em-dom alyp jatqan qos naýqastyń da jaǵdaıy qanaǵattanarlyq. Odan bólek, Kýmyska kentindegi provızorlyq gospıtalde – 57 adam, Báıterek aýdanynda JRVI belgileri bar – 13 adam, oblystyń karantındik gospıtaline – aýrýmen qarym-qatynasta bolǵan 28 adam jatqyzyldy. Olar kúndelikti medısınalyq baqylaýǵa alynǵan.
Mamandardyń pikirinshe Batys Qazaqstan oblysy aýmaǵynda epıdemıologııalyq jaǵdaı salystyrmaly túrde turaqty, koronavırýstyq juqpa boıynsha jańa oqıǵa tirkelgen joq. Oblys aýmaǵynda kúsheıtilgen karantın rejimi engizildi, Oral, Aqsaı qalalarynda, aýdan ortalyqtarynda TJ bólimderi daýys zoraıtqyshpen halyqqa aqparat taratýda. Oral qalasyndaǵy alańdar, kósheler, avtobýs aıaldamalary men oryndyqtardy júıeli dezınfeksııalaý úshin 132 adam, 36 tehnıka jumyldyrylǵan. Jaman aıtpaı jaqsy joq, koronavırýs ınfeksııasymen aýyrǵandar shyǵa qalsa, olardy stasıonar mekemelerine tasymaldaý úshin Oral qalasynda joǵary ótimdi 5 tehnıka, Aqsaıda 1 kólik daıyn tur. Turǵyndardyń kez kelgen saýalyn qabyldap, jaýap berý úshin jedel shtab táýlik boıy jumys istep tur.
Batys Qazaqstan