Bıylǵy, ıaǵnı 2020 jyldyń 31 naýryzyna deıin Medısınalyq saqtandyrý qoryna 298,1 mlrd teńgeden astam qarjy jınaqtaldy. Bul týraly búgin «Áleýmettik medısınalyq saqtandyrý qory» KEAQ Almaty qalalyq fılıaly ókilderi habarlady.
«Almaty qalasy respýblıka boıynsha jarnalar men aýdarymdardyń kólemi jaǵynan kósh bastap tur – jınaqtalǵan somanyń besten bir bóligi burynǵysha, ońtústik astanalyqtarǵa tıesili. Jalpy, saqtandyrý júıesi iske qosylǵan 2017 jyldyń 1 shildesinen 2020 jyldyń 31-naýryzynadeıingi aralyqta Almaty qalasynan Qorǵa 60 mlrd teńgeden astam jarna aýdaryldy. Onyń 54,7 mlrd teńgesi – jumys berýshilerdiń qaramaǵyndaǵy jumyskerler úshin jasaǵan aýdarymdary», - dedi «Áleýmettik medısınalyq saqtandyrý qory» KEAQ Almaty qalalyq fılıalynyń dırektory Nurlybek Qabdyqaparov.
Sondaı-aq jyl basynan beri ózin-ózi jumyspen qamtyǵan 10 myńǵa jýyq adam 40,1 mln teńge kóleminde biryńǵaı jıyntyq tólem tólegen.
Esterińizge sala ketsek, biryńǵaı jıyntyq tólem 2019 jyldyń 1 qańtarynan bastap engizilgen bolatyn. Jıyntyq tólemniń ishinde ózge áleýmettik tólemderge qosa saqtandyrý jarnasy da bar. Ol jalpy somanyń 40 prosentin quraıdy.
BJT – respýblıkalyq mańyzy bar qalalar úshin 1 aılyq eseptik kórsetkish (AEK) nemese 2651 teńge, aýyldyq jerler úshin – 0,5 AEK nemese 1326 teńge kóleminde belgilengen. Tólemniń bul túrin frılanserler, santehnıkter, qurylysshylar, taksı júrgizýshileri t.b. tóleı alady.