Jambyl oblysynda koronavırýs ınfeksııasyn juqtyrý boıynsha taǵy 3 derek tirkeldi. О́kinishke qaraı, indet juqtyrǵandar sany 9 adamǵa jetti. Oblystyq densaýlyq saqtaý basqarmasynyń basshysy Marat Jumanqulov osy máselege baılanysty búgin arnaıy brıfıng ótkizdi.
Birinshi naýqas – aǵymdaǵy jyly 17 naýryz kúni Qordaı aýdanyna kelgen Nur-Sultan qalasynyń 30 jastaǵy turǵyny. Ol 30 naýryz kúni JRVI belgilerimen aýrýhanaǵa jatqyzylǵan. Alynǵan qan taldaýlarynyń qorytyndysy koronavırýsqa oń nátıje kórsetken. Ol búginde ınfeksııalyq stasıonarǵa aýystyrylǵan. Al, onymen jaqyn baılanysta bolǵan 9 adam anyqtalyp, karantındik stasıonarǵa ornalastyrylǵan. Zerthanalyq zertteý úshin taldaýlar alynǵan. Sonymen qatar, ekinshi naýqas buǵan deıin anyqtalǵan naýqaspen baılanysta bolǵan 24 jastaǵy azamat bolyp shyqty. Bul jaǵdaı da Qordaı aýdanynan tirkeldi. Onymen qarym-qatynasta bolǵan 5 adam karantındik stasıonarǵa oqshaýlanyp, olardan zertteýge materıaldar alynǵan. Sondaı-aq, Marat Jumanqulov sanıtarlyq-epıdemııalyq qyzmetter olardyń turǵylyqty jáne barǵan jerleri boıynsha da dezınfeksııalyq óńdeýler júrgizgenin aıtty.
Jambyl oblysynda tirkelgen toǵyzynshy derek – Bishkek-Almaty baǵyty boıynsha júk tasymaldaǵan 59 jastaǵy Túrkııa azamaty bolyp shyqty. Algorıtmge sáıkes, medısınalyq qyzmetkerlerdiń úılesimdi áreketteriniń nátıjesinde azamat Qyrǵyz-Qazaqstan shekarasynan engen ýaqytta karantındik stasıonarǵa oqshaýlanǵan. Túrkııa azamatynan alynǵan qan taldaýlary koronavırýsqa oń nátıje kórsetken. Onymen jaqyn baılanysta bolǵan 4 adam anyqtalyp, karantınge ornalastyrylǵan. Biraq, olardyń qan taldaýlary teris nátıje kórsetken.
Jambyl oblysy