Búgin Prezıdent Nursultan Nazarbaev Parlament V shaqyrylymynyń 3 sessııasyn ashý barysynda elimiz jetistikterin atap ótip, alda turǵan mindetterdi de júıelep shyqty. Bul týraly «QazAqparat» agenttigi habarlady.
«Qazaqstan ekonomıkasynyń quqyqtyq negizi jaqsaryp, salyq júıesi jetildirildi. Shaǵyn jáne orta bıznesti damytýdyń zańnamalyq kóp máseleleri sheshildi. Zeınetaqy júıesin jańǵyrtý, bilim berý jınaqtaý júıesin qurý, memlekettik qyzmet kórsetý týraly jáne basqa da kóptegen mańyzdy áleýmettik zańdar qabyldandy. Búgingi tańda Parlamenttiń qaraýynda otyzǵa jýyq zań jobasy bar. Parlamentimiz joǵary saıası jaýapkershilik rejıminde jumys istep, halyq ókili retinde óz mindetin abyroımen atqardy. Aldaǵy ýaqytta Biregeı ekonomıkalyq keńistik baǵytyn damytýda da Parlamentti mańyzdy jumystar kútip tur. Belarýs elimen jáne Reseımen birlese biz Eýrazııalyq ekonomıkalyq odaq quratyn bolamyz. 2014 jyly eýrazııalyq ıntegrasııanyń jańa deńgeıindegi bazalyq kelisim-sharttardyń basty qujattar toptamasyn ázirleý aıaqtalmaq. Osyǵan oraı Parlament Májilisi men Senatynyń depýtattary zań shyǵarmashylyǵyndaǵy osy baǵyttardyń barlyǵy boıynsha jemisti jumystar atqarady dep senemin», - dedi Memleket basshysy sóz oraıynda.
Elbasy bıylǵy jyldyń qarashasynda «EKSPO-2017» halyqaralyq kórmesin ótkizý úshin qajetti zań jobasy engiziletinin, jer qoınaýyn ónimsiz alypsatarlyq praktıkasynan qorǵaý qajettigin de atap ótti. Keıbireýler kezinde jerdi menshigine alyp, áli kúnge deıin oǵan ınvestısııa quımaı otyr eken. Sondyqtan da munyń aq-qarasyn ashý óte mańyzdy bolyp otyr.
«Jahandyq jańa daǵdarystyń múmkindigi azaımaı otyr. Eksporttyq ónim men shıkizatqa baǵanyń turaqsyzdyǵy uzaq merzimdi úrdis sekildi. Syrtqy nesıelendirýge ǵana senim artý qısynsyz, sondyqtan eldi damytýdyń barlyq ishki múmkindikteri men kózderin jumyldyrý kerek. Osyǵan baılanysty bıznestiń ózin senimdi sezinýine múmkindik beretin quqyqtyq ortany qurý mańyzdy bolyp tabylady. Atap aıtqanda, Men Úkimetke kásipkerlik kodekstiń jobasyn ázirleýdi tapsyrdym. Onda qazaqstandyq kásipkerlik qyzmetiniń jáne memleketpen ózara is-qımyldyń bazalyq ustanymdary aıqyndalýy tıis. Bul bizdiń bıznestiń konstıtýsııasy ispettes bolýy qajet», - dedi Prezıdent. Kelesi mańyzdy zań jobasy «Ruqsat berý jáne eskertýler týraly» ekenin aıta kele, onda bıznes-qurylymdarǵa qatysty kez kelgen bıýrokratııalyq qol suǵýshylyqtan naqty kepildikter jazylýy tıis. Aǵymdaǵy jyldyń sońyna deıin Úkimetke atalǵan jobany Májiliske engizýdi tapsyramyn», - dep júktedi.
Danııar Túımebaı.