Qyzylordada vırýs juqtyrǵan alǵashqy turǵyn anyqtalǵaly beri týra 1 apta ótti. Jeti kúnniń ishinde jasalǵan jumys jaıly búgin oblystyq densaýlyq saqtaý basqarmasynyń basshysy Jaqsylyq Ábdisámetov onlaın rejimde brıfıng ótkizdi.
Bas dáriger osy ýaqytqa deıin oblys aýmaǵynda 15 oshaq, 28 naýqas tirkelgenin atap ótti. Talapqa saı oshaqtarǵa der kezinde sanıtarlyq-dezınfeksııalyq jumystar jasalyp, basqa da qaýipsizdik sharalary kúsheıtildi. Qyzylorda qalasy men Jańaqorǵan aýdanynda karantın jarııalanyp, basqa aýdandarda da birqatar shekteýler engizildi.
– Naýqastarmen qarym-qatynasta bolǵan 715 adam anyqtalyp, olardyń bári tekserildi. Sonymen qatar, ózge oblystan kelgen 5 myńnan asa stýdent pen qaýiptiligi joǵary elden kelgender de baqylaýǵa alyndy. Jańadan 20 qorap synama test jetkizildi, – dedi oblystyń bas dárigeri.