Batys Qazaqstan oblysy Aqjaıyq aýdany Almaly aýyldyq okrýgine qarasty Atameken aýylynda Mahambet О́temisuly atyndaǵy mektep bar. Shaǵyn eldi mekende aıadaı úıge qamalǵan oqýshylar jaqynda qyzyq ermek tapty. Ony uıymdastyrǵan – qosymsha bilim berý pedagogy Jánibek Ábilpeıisov.
- Karantınniń kesirinen oqshaýlanyp qalǵan shákirtterim úshin WhatsApp jelisinde arnaıy top quryp, ólketaný baıqaýyn ótkizýdi oıladym. Alǵashqy onlaın saıys-sabaqtyń taqyrybyn «Aýlymyzdyń aıtýly tulǵalary» dep atadym. Suraqtar negizinen ózimizdiń Atameken aýylyna, Taıpaq óńirinen shyqqan aıtýly tulǵalar jaıly boldy. Bul málimettiń kóbi aýlymyzdaǵy «Jeruıyq» murajaıynda turǵan, oqýshylar biletin derekter bolatyn, - deıdi Jánibek.
Naýryzdyń 31-i kúni ótken «Jeruıyq» úıirmesiniń onlaın-sabaǵyna aýyl mektebiniń 40 oqýshysy qatysypty. Balalardy qyzyqtyrý úshin Jánibek eń kóp upaı jınaǵan 3 júldegerge óz qaltasynan aqshalaı báıge taǵaıyndaǵan.
Sabaqtyń aty – «Tulǵalar»,
Bilgen bala júlde alar!
Tulǵalardy bilmegen –
«Edınısadan» qur qalar, – dep báıgeni bastap ketken aýyl muǵalimi «Oqýshylarym onlaın-sabaqqa munshalyq qyzyǵýshylyqpen qatysady dep ózim de oılamadym» deıdi. 45 mınýtqa josparlaǵan saıys saǵat jarymǵa sozylyp, júldeger anyqtalǵan soń da qyzý talqy bolypty. «Kelesi saıys qashan, aǵaı?!» dep surap júrgender kóp.
Aıta keteıik, Jánibek Ábilpeıisov shaǵyn aýylda óz kúshimen mýzeı ashyp, batyrdyń bes qarýyn jınaǵan jigit. Oqýshylarymen birigip toqyǵan badana kóz saýyty búginde biraz jerge áıgili. О́lketaný baǵytyndaǵy birneshe kitaptyń avtory Taıpaq óńirindegi epıgrafıkalyq ekspedısııalarǵa da qatysyp júr. 2018 jyly Jánibek Ábilpeıisov Qazaqstan Respýblıkasynyń Mádenıet mınıstri qol qoıǵan «Úzdik ólketanýshy» tósbelgisine ıe boldy. Osynyń bári aýyl ustazynyń izdenimpaz eńbekqorlyǵyn kórsetip tur.
Búginde karantınge, qashyqtan oqytýǵa baılanysty Jánibekti eńbek demalysyna jiberipti. Biraq oqýshylardyń suranysymen saıys-sabaq jalǵasyp jatyr. «Ǵımaraty apat jaǵdaıynda turǵan shaǵyn mektepte meniń sabaǵyma kabınet jetpeı, ótkizetin jer tappaı qınalatyn edim. Myna onlaın-sabaq maǵan jaqsy boldy» deıdi ólketanýshy ustaz.
https://drive.google.com/file/d/1cNIwmMim55SLOZHiZVxeCvC0jOs9yaeu/view
Batys Qazaqstan