«AZALA Textile» toqyma kombınatynda táýligine 5 myń tósek-oryn jabdyǵy shyǵarylady. Osylaısha, fabrıka jylyna 2,5 mln-nan astam tósek jabdyqtaryn, sondaı-aq, 7 mln danadan astam túkti buıym shyǵara alady dep habarlaıdy IIDM baspasóz qyzmeti.
Búgingi tańda «AZALA Textile» kompanııasy - maqta talshyǵyn óńdeýden bastap, daıyn buıymdardy tigýmen aınalysatyn, ıaǵnı óndiristiń tolyq sıklin júrgizetin elimizdegi jalǵyz kásiporyn. Mysaly, arshylmaǵan maqtany óńdeýdiń óndiristik qýaty jylyna 60 myń tonnany quraıdy. Al maqta talshyǵyn shyǵarýdyń jyldyq kórsetkishi 19 700 tonna.
Kompanııanyń jip ıirý sehy shveısarııalyq RieterAG fırmasynyń jabdyǵymen jabdyqtalǵan. Ol ıirimjip óndirý boıynsha mashına jabdyqtaryn jobalaý jáne óndirý salasynda álemdik kóshbasshy sanalady. Munda jylyna 6800 tonna ıirimjip óndiriledi.
Sondaı-aq «AZALA Textile» toqyma óndirisi maqta-mata kıim matalaryn - bóz, mıtkal, eni 155-den 320 sm-ge deıingi atlas, kıetin-tvıll, drıll, eni 160 sm jartylaı panama jáne oramal túkti, vafeldi toptardy daıyndaıdy. Munda jylyna 35 mln sharshy metr mata óndiriledi. Aıta ketý kerek, barlyq qurylǵy kompıýterlik baqylaý jáne jumystyń belgilengen parametrlerin retteý júıelerimen jabdyqtalǵan. Osylaısha, barlyq tehnologııalyq prosestiń turaqtylyǵy saqtalýda.
«Bıznestiń jol kartasy-2020» memlekettik baǵdarlamasyna qatysýdyń arqasynda 2014-2015 jyldary kombınattyń óndiristik qýaty keńeıtildi. Boıaý-óńdeý jáne tigin sehtary iske qosyldy. Boıaý-óńdeý baǵytynda boıaý prosesi eki túrli júrgiziledi: tegis (matany belgili bir túske boıaý), sondaı-aq baspada, ıaǵnı mataǵa sýret túrinde boıaý jaǵý. Sehta qospaly jáne maqta-mata matalardy, sonyń ishinde túkti matany árleýge arnalǵan joǵary tehnologııalyq eýropalyq jabdyq qoldanylady.
Búginde «AZALA Textile» JShS kombınaty ónimniń keń assortımentin shyǵarady. Bul - daıyn óńdelgen matalar, túkti jáne vafeldi súlgiler men aqjaımalar, tósek-oryn jabdyǵy, jastyq pen kórpe tystary, balalar toqymasy, sondaı-aq qatty ıirimjip (100% maqta), qatty matalar (100% maqta, tegis, túkti, vafeldi). Munda qonaq úılerdi, demalys úılerin, balabaqshalar men lagerlerdi, meıramhanalar men dámhanalardy keshendi qamtamasyz etýge arnalǵan toqyma jáne taýarlar shyǵarylady. Kombınattyń barlyq ónimi ulttyqjáne halyqaralyq sapa standarttarynyń talaptaryna sáıkes sertıfıkattalǵan.
Jalpy quny 3,8 mlrd. teńgeni quraıtyn «AZALA Textile» jobasy memlekettik ındýstrııalandyrý baǵdarlamasy aıasynda júzege asyryldy. Fabrıkany iske qosý ımport almastyrý jáne jańa jumys oryndaryn ashý syndy maqsattardy kózdedi. Búgingi tańda kompanııada 650 adam eńbek etedi. О́nimniń joǵary sapasynyń arqasynda kombınat Qazaqstannyń jeńil ónerkásibi kóshbasshylarynyń biri bolyp qana qoımaı, Lıtva, Latvııa, Germanııa, Italııa, Polsha, sondaı-aq jaqyn shet elderge taýar eksporttaıdy.