Koronavırýstyń kesiri bilimge qushtar býynǵa da aýyr tıip tur. Degenmen, indet úıge tyqty eken dep qol qýsyryp qarap otyrýǵa taǵy bolmaıdy. Bul turǵyda Qaraǵandy oblysy tyǵyryqtan alyp shyǵar joldy izdestirý ústinde.
Keshe oblys ákiminiń orynbasary Abzal Núkenov pen bilim berý basqarmasynyń basshysy Esenǵazy Imanǵalıev tikeleı efırge shyǵyp, aımaqtyń qashyqtan oqytý tásiline kóshýge daıyn ekenin málimdedi.
Tyń tásildiń myń máselesi bar
Oblysta oqýshylardyń basym bóligi IV toqsandy onlaın rejıminde bastaıtyn boldy. Jaýapty tulǵalardyń aıtýynsha, bul jaýapty iske qajetti jaǵdaı jasalynǵan. Mysaly, oqýshylar gadjettermen jáne ınternetke qoljetimdilikpen qamtamasyz etilgen eken.
– Sáýirdiń 6-nan bastap oqýshylar arasynda qashyqtan oqytý bastalady. Bul Qazaqstan úshin, biz úshin tyń tájirıbe. Sondyqtan, biz osy jańalyqqa, ásirese, ata-analar tarapynan túsinistikpen qaraýdy suraımyz. Dál qazirgi ýaqytta ata-analardyń basty mindeti – balalarmen, mekteppen jáne muǵalimdermen birge aqparat pen bilimniń paıdaly jáne ónimdi kózderin izdeý jáne qoldaný dep oılaımyn, – dedi Abzal Núkenov.
Oblystyq bilim berý basqarmasynyń basshysy Esenǵazy Imanǵalıev óńirdegi onlaın-oqytý júıesiniń qalaı iske asyrylatyny týraly aıtyp berdi.
– Oblystaǵy 187 198 oqýshy, ıaǵnı jalpy sannyń 94%-y ınteraktıvti platformalarda oqıtyn bolady. Bul sanattaǵy balalar kompıýterlermen, gadjettermen jáne ınternet jelisine qosylý múmkindigimen tolyq qamtamasyz etilgen. Oqýshylardyń 2% nemese 4 619 bala úshin qashyqtan oqytý «El arna» jáne «Balapan» respýblıkalyq arnalarynda televızııalyq sabaqtar arqyly uıymdastyrylady. Bul sabaqtar tek telearnalarda ǵana emes, ınternette de, radıoda da qoljetimdi bolady, – dedi ol.
Qashyqtan oqytý kezeńinde aımaqtyń ınternet-provaıderlerimen arada paıdalanýshylardy nóldik teńgerimde bolsa da jeliden ajyratpaý týraly kelisim bar. Sonymen qatar, BilimMediaGroup jáne DarynOnline bilim berý platformalaryna kirý tegin bolady.
Aýyl balasy alystan oqymaıdy
Oblystyq bilim berý basqarmasynyń basshysy alys aýyldardaǵy shaǵyn mektepter burynǵysha jumys isteı beretinin habarlady. Bul sanatqa enetin 123 bilim oshaǵynda 7 624 bala oqıdy eken. Tórtinshi toqsan bastalysymen, atalǵan mektepter eki aýysymda jumys isteıtin bolady. Synyptardyń tolymdylyǵyna qaramastan, kabınettik júıe alynyp tastalady. Budan bólek, bul mektepterdegi sanıtarlyq rejım kúsheıtiledi.
Qaraǵandy oblysynda mektebi joq 125 aýyl bar eken. Onda turatyn 2 105 oqýshynyń 1 477-i qashyqtan bilim alatyn boldy. Búgingi kúnde olar gadjettermen jáne ınternetke qoljetimdilikpen qamtamasyz etilgen. Sonymen qatar, 105 bala oqýdy teledıdardyń kómegimen jalǵastyrady, al olarǵa tapsyrmalar poshta arqyly jiberiledi. Taǵy 453 oqýshy jaqyn mańdaǵy aýyldardaǵy mektepterde oqıtyn bolady. 70 bala týystaryna ýaqytsha kóshirilip, olardyń 15-i qashyqtan jáne 55-i dástúrli túrde bilim alady.
Qarap tursańyz, alystan oqytý ádisiniń aýyl balalaryna ońaıǵa túspeıtin túri bar. Tehnologııalyq ıgilikterdiń jetispeýshiligi qoldy osylaı baılamasa, aýyl balasy bóten úıdiń bosaǵasyn saǵalamaı, óz otbasynda otyryp-aq oqyr edi ǵoı...
Esep berilmeıdi, baǵa qoıylmaıdy...
Spıkerlerdiń aıtqanyna sensek, qazirgi ýaqytta oblys boıynsha 12 myń oqýshy men 2 myń ustaz gadjettermen qamtamasyz etilgen eken. Sondaı-aq, olarǵa 14 myńǵa jýyq mektep kompıýteri ýaqytsha paıdalanýǵa beriledi. Buǵan qosymsha 1049 planshet pen 150 kompıýter satyp alynǵan.
Kópbalaly jáne az qamtylǵan otbasylar da umyt qalmady. Bul sanatqa enetin 1915 oqýshy demeýshilerdiń qarajaty jáne bıýdjet esebinen ınternet-baılanyspen qamtamasyz etildi.
Jalpy, qashyqtan oqytý kezeńinde muǵalimderge skrınder jasap, ótkizilgen sabaqtar týraly esepterdi tapsyrýdyń qajeti joq jáne oqýshylarǵa baǵa qoıylmaıdy.
Eske salar bolsaq, oblysta 1 sáýir kúni 16 myń onlaın-sabaq ótip, oǵan 166 myń oqýshy qatysqan bolatyn. Iаǵnı, óńir pedagogtarynda az da bolsa bul baǵytta tájirıbe bar.
Brıfıngke qatysqan spıkerler mektep túlekterine arnalǵan emtıhan pishimi men testileý kezeńi burynǵy betinde qalatynyn jetkizdi. «Ázirge bul máselege qatysty ózgerister bolatyny týraly áńgime aıtylǵan joq», dep atap ótti olar.
Qaraǵandy oblysy