Áıgili «Formýla-1» Gran-prı jarysynyń kezekti bir kezeńi bıylǵy jyldyń 25-27 qyrkúıek aralyǵynda Reseıdiń Sochı qalasynda ótýge tıis.
Koronavırýs detiniń órshýine baılanysty ústimizdegi jyly aıtýly jarystyń kóptegen kezeńderi ótpeı qalǵany belgili. Solardyń qatarynda Aýstralııa, Bahreın, Vetnam, Qytaı, Nıderland, Ispanııa, Ázirbaıjan jáne Monakodaǵy básekeler bar.
Desek te, Reseı jaǵy «Formýla-1» jarysyna jan-jaqty daıarlanyp jatqanǵa uqsaıdy. Sol jarystyń reseılik kezeńine jaýapty maman Alekseı Tıtovtyń aıtýynsha, koronavırýske baılanysty avtodromnyń ýaqytsha jabylǵanyna qaramastan uıymdastyrý jumystary qyzý júrgizilýde. Eger indet seıilse, onda dúbirli dodany Qara teńiz jaǵalaýynda ótkizýge esh kedergi joq.
Esterińizge sala keteıik, byltyr ótken dál osy jarysta «Mersedes» kóligin tizgindegen Ulybrıtanııanyń áıgili júrgizýshisi Lıýıs Hemılton bas júldeni oljalady. Ekinshi jáne úshinshi oryndardy fınlıandııalyq Valtterı
Botas («Mersedes») pen monakolyq Sharl Lekler («Ferrarı») ıelendi.