Nur-Sultan qalasy ákimdigi 14 kún boıy karantınde bolǵan basqa qalanyń azamattaryna arnaıy kólik bóldi. Barlyq azamattar shet elden ushyp kelgender. Azamattardan koronavırýs anyqtalmaǵan, endi olar Almaty, Pavlodar, Petropavlov, Qaraǵandy jáne de basqa qalalarǵa óz úılerine qaıtatyn boldy dep habarlaıdy elorda ákimdiginiń resmı saıty.
«Biz 24 naýryz kúni Dýbaıdan ushyp keldik. Dál sol kúni karantınge «Ramada Plaza» qonaqúıine ornalastyrdy. Qonaqúıde bolǵan 14 kún ishinde koronavırýsqa baılanysty birneshe ret saraptama jasady. Barlyǵy jaqsy boldy», - deıdi Pavlodar qalasynyń turǵyny Áıgerim Orazalına.
Qaraǵandylyq Irına Lehman Nur-Sultanǵa Germanııadan ushyp kelgen. Qalaǵa túskennen keıin basqa da jolaýshylarmen birge «Ramada Plaza» qonaqúıine ornalastyrylǵan. Karantınniń kelesi kúnderinde aýrýhanada bolǵan.
«Bizge birneshe márte saraptama jasaldy. Barlyǵy da teris nátıje kórsetti. Qonaqúıdiń taǵamdary, bizdi kútken medısına qyzmetkerleri de óte jaqsy boldy. Barlyǵy úshin rızashylyq bildiremiz», - deıdi Irına Lehman.
О́zge qalalarda turatyn azamattar úıge qaıtý úshin kólik uıymdastyrǵany úshin Nur-Sultan qalasy ákimdigine alǵys bildirdi.