Osydan týra 40 jyl buryn, ıaǵnı 1980 jyldyń 6 sáýirinde Kanadanyń dańqty hokkeıshisi Gordı Hoý óziniń sońǵy matchyn ótkizdi. «Detroıtqa» qarsy kezdesýde «Hartfordtyń» sapyndaǵy aıtýly oıynshy gol soqqanymen, match 5:3 esebimen qarsylas komandanyń paıdasyna sheshildi.
Gordı Hoýǵa kóptegen rekordtyq kórsetkishter tıesili. Hokkeıshi retinde ol tabany kúrekteı 35 jyl óner kórsetti. 1946-1980 jyldary aralyǵynda Ulttyq hokkeı lıgasynda (UHL) oınady. Sol aralyqta 1850 ret muz aıdynyna shyǵyp, 869 ret qarsylastar qaqpasyn dál kózdedi. Ol kezde bul rekordtyq nátıje edi. Keıinnen gol soǵý jáne nátıjeli pas berý jaǵynan Ýeın Gretskı ardagerdiń aldyn orap ketti. Esesine Hoýdyń basqa rekordtyq kórsetkishteri áli de saqtalýda.
Kanadanyń Saskachevan qalasynyń týmasy Stenlı kýbogyn tórt ret ıelendi. Turaqty birinshilikte eń kóp upaı jıǵan oıynshy retinde «Art Ross Trofı» syılyǵyn alty ret enshiledi. UHL-nyń «Juldyzdar matchynda» baqandaı 23 márte óner kórsetti. Onyń esimi hokkeıshilerdiń Dańq zalyna engen. Sol sekildi Gordıdiń basqa da qol jetkizgen tabystary jeterlik. Taǵy bir qyzyq derek, eger bir match barysynda bir hokkeıshi gol soǵyp, pas berip jáne qarsylastar komandasynyń oıynshysymen tóbelesken jaǵdaıda «Gordı Hoýdyń het-trıgi» degen beıresmı syılyqty ıelenedi.
Shaý tartqan shaǵynda Hoý tómengi dıvızıondarda oınady. Sol jarystarda da ol ózin jaqsy qyrynan kórsetti. Al sońǵy ret muz aıdynyna shyqqanda Gordı 52 jasta edi. Dańqty hokkeıshi 2016 jyldyń jazynda 89 jasqa qaraǵan shaǵynda qaıtys boldy.