Petropavl qalasyndaǵy jalpy bilim beretin IT-lıseıdiń 2 «á» synyp oqýshylary úıde otyryp, aty jaman indetpen kúreste aldyńǵy shepte júrgen ata-analary – medısına qyzmetkerlerine, polıseılerge, áskerılerge sýretter salyp: «Áke, biz sizdi úıde kútemiz!», «Biz birgemiz!», «О́zińizdi kútińiz», «Barlyǵynyń saýyǵyp ketkenin tileımiz!» degen áserli sýretterimen patrıottyq klıp oılap taýypty. Ony «Árqashan kún sónbesin!» ánimen oryndap, óz akkaýnttaryna ornalastyrǵan. Tek osy synyptyń ózinde-aq 9 polısııa qyzmetkeri men ardageriniń jáne 2 áskerı qyzmetshiniń balalary oqıtyn bolyp shyqty...
Ekinshi synyp oqýshylarynyń qoldaýy eresekterdiń kóńilinen shyqty jáne atalǵan klıp áleýmettik jeliler men saıttardyń vedomstvolyq akkaýnttaryna ornalastyrylady. Oblystyq polısııa vedomstvosynyń basshysy Marat Tólebaevtyń aıtýyna qaraǵanda erekshe jaǵdaıda qyzmet atqaryp júrgen polısııa qyzmetkerleri úshin soltústikqazaqstandyqtardyń kez kelgen qoldaýy asa mańyzdy. О́ńir polıseıleri qazir qyzmetti úsh aýysymda atqaryp júr. «Qoldaý kórsetip jatqan bizdiń eriktilerimizge, túsinistik pen tózimdilik tanytyp jatqan dárigerlerdiń, polıseılerdiń, qutqarýshylar men áskerılerdiń otbasy múshelerine alǵys bildiremin. Kip-kishkentaı júrekterindegi sheksiz patrıottyq sezimderi úshin oqýshylarǵa erekshe rızamyn!» - dedi departament bastyǵy.
Búgingi tańda Soltústik Qazaqstan oblysynda qaýipti indetti juqtyrǵan 25 adam tirkelgen. Oblys ortalyǵyn patrýldeýge kún saıyn 500-den astam polısııa qyzmetkeri men áskerı qyzmetshiler tartylǵan.
Soltústik Qazaqstan oblysy