«Men úshin jumyr jerdiń jumaǵy – óz týǵan jerim». Kórnekti ekonomıst ǵalym, akademık Kenjeǵalı Saǵadıev jýrnalısterge bergen bir suhbatynda osylaı degen edi. Osy pikirin óziniń kindik qany tamǵan Aqkóliniń aýasyn jutyp, topyraǵyna aýnaǵanda da, Arqalyq qalasyna, Torǵaıǵa, Amangeldi men Naýyrzymǵa barǵanda da, bilim nárimen sýsyndaǵan Áýlıekólge kelgende de, Qostanaı qalasynyń jurtshylyǵymen kezdeskende de qaıtalady.
«Men úshin jumyr jerdiń jumaǵy – óz týǵan jerim». Kórnekti ekonomıst ǵalym, akademık Kenjeǵalı Saǵadıev jýrnalısterge bergen bir suhbatynda osylaı degen edi. Osy pikirin óziniń kindik qany tamǵan Aqkóliniń aýasyn jutyp, topyraǵyna aýnaǵanda da, Arqalyq qalasyna, Torǵaıǵa, Amangeldi men Naýyrzymǵa barǵanda da, bilim nárimen sýsyndaǵan Áýlıekólge kelgende de, Qostanaı qalasynyń jurtshylyǵymen kezdeskende de qaıtalady. О́ziniń 75 jasqa kelgen mereıtoıynyń qurmetine Torǵaı jerinen bastaǵan saparyn Qostanaıda túıindegen Kenjeǵalı Ábenulynyń qurmetine arnalǵan kesh oblys ortalyǵyndaǵy I.Omarov atyndaǵy qazaq drama teatrynda ótti. Oblys ákimi Nuraly Sádýaqasov akademıkti mereıjasymen quttyqtap, «Qostanaı oblysynyń qurmetti azamaty» qurmetti ataǵynyń №1 kýáligin tabys etip, ıyǵyna shapan japty. Kenjeǵalı Saǵadıevpen birge kelgen kórnekti jazýshy, Qazaqstannyń Eńbek Eri Ábish Kekilbaev, Parlament Májilisiniń depýtaty Qýanysh Sultanov, oblystyq ardagerler keńesiniń tóraǵasy Kenjebek Ýkın mereıtoı ıesin quttyqtady.
– Halqynyń ózinen burynǵy iz salyp ketken Ahmet Baıtursynov, Qanysh Sátbaev sekildi iri tulǵalarynyń murageri bolyp, solar armandaǵan ǵylym bıigine shyqty. Ol shyqqan bıigin ózin nasıhattaý úshin emes, halqyna qyzmet etýge paıdalanyp keledi. О́zi de halqynyń bir kelbetine aınaldy, – dedi Parlament Májilisiniń depýtaty Qýanysh Sultanov.
– Meniń babalarym birneshe ǵasyr buryn Aqkól men Áýlıekóldiń arasyn jaılaǵan eken. О́zim de bala kezde osy eki arany sharlaıtyn edim. Jasym jetpis beske kelgende sol týǵan jerdi túletip turyp jatqan atalarymnan qalǵan urpaqtyń júzin kóreıin, sálem bereıin degen oımen balalyǵym, jastyǵym ótken týǵan jerdi aralaýdy jón kórdim. Arqalyq, Torǵaı, Amangeldi, Naýyrzym, Áýlıekólde birneshe kezdesýler boldy. Sonda jerlesterimniń jarqyn júzin, jyly júregin, bolashaqqa senimin kórip, kóńilim bıiktedi, – dedi Kenjeǵalı Ábenuly tebirenip.
Akademık bul saparyn tek mereıtoıdy toılaý emes, perzenttiń týǵan jerge esep berýi ekenin de aıta ketti.
Týǵan jerdegi kezdesýlerdiń barlyǵy da úlken tulǵanyń mereıin asyryp qana qoıǵan joq, onyń jerlesterine bergen ónege, taǵlymymen de erekshelendi, qadiri arta tústi. Bala bolyp ketip, dana bolyp oralǵan perzentin týǵan jer án-jyrmen de aıalady.
Názıra JÁRIMBETOVA,
«Egemen Qazaqstan».
Qostanaı.