Halyq qamyn oılaǵan kásipkerler óz kásiporyndaryna keler shyǵynǵa qaramastan búgingi kúni asa qajetti jańa ónim shyǵarýdy qolǵa alyp otyr.
El ishinde etek alyp kele jatqan indetten arashalaıtyn qorǵanys quraldarynyń tapshy ekendigi belgili. Oblys ortalyǵyndaǵy «Kókshetaý mıneraldy sýlary» seriktestigi antıseptık úlgisindegi vırýstan qorǵaıtyn jańa ónim shyǵara bastady.
Kásiporyn basshylarynyń aıtýyna qaraǵanda, jańa ónim shyǵarý birshama qıyndyq týǵyzady. Aldymen qosymsha qarajat qajet. Buryn mundaı ónim shyǵarmaǵandyqtan qural-jabdyqty jańǵyrtýǵa týra keledi.
–Áıtse de, otandastarymyzdyń densaýlyǵy bárinen qymbat, – deıdi jańa ónimdi shyǵarýshylar.
«Aseptdezın» quramynda spırti bar jańa ónim. Ol dúnıejúzilik densaýlyq saqtaý uıymynyń usynysy boıynsha daıyndalyp otyr. О́nimniń quramyndaǵy spırt quramy 70 prosentten kem emes. Terini jumsartý úshin glıserın qosylǵan.
Kásipkerlerdiń el jaıyn oılaǵan jaqsy nıetinen týǵan ońdy oı sátimen sabaqtalyp, jańa ónim jamaǵatqa jol tartty.