Qazaly aýdanynyń ortalyǵy Áıteke bı kenti janynda áıgili Jalańtós batyr atyn ıelengen aýyl bar. Batyrlyǵynyń arqasynda «Turan jolbarysy» atanyp, kóregendigimen Samarqandy uzaq jyl bılegen Jalańtós Seıitqululy osy topyraqta dúnıege kelgen eken. Ortalyq Azııadaǵy qaharman qolbasshylardyń biri sanalǵan batyr atyndaǵy aýyl qazir tútini túzý ushqan eldi mekenniń birine aınalyp otyr.
Qarasheńgel aýyldyq okrýginiń ortalyǵy sanalatyn aýyl – kezinde Qıyr Shyǵystan jer aýyp kelgen koreılerdi panalatqan eldi meken. «Qyzyltý» ujymsharyna jıyrma shaqty úı bolyp qonys teýip, qońsy bolǵan olardyń arasynan kúrish óndirisindegi ozyq tájirıbesimen tanylǵan Petr Pak Sosıalıstik Eńbek Eri atandy. Soǵys jyldarynda ujymshardy basqarǵan Qashaqbaı Pirimov tank jasaý úshin 100 myń som aýdarǵan qaıratker azamat. Tóraǵanyń bastamasy basqalarǵa úlgi bolyp, tyldaǵy qazalylyq eńbekkerler jeńisti jaqyndatýǵa úles qosqan.
Qazir aýylda 1 JShS, 13 sharýa qojalyǵy bar. Barlyǵy derlik kúrish sharýashylyǵymen aınalysady. Osy kúni kóp aýylda áleýmettik nysandardyń jetispeıtini baıqalady. Al «Jalańtós batyr» bul jaǵynan basqalarǵa úlgi bolardaı. Aýylda 250 oryndyq jańa tıptegi mektep, balalar shaǵyn ortalyǵy men balabaqsha, dárigerlik ambýlatorııa, kitaphana, aýyldyq klýb bar. Báriniń de ǵımaraty sońǵy jyldary boı kótergen.
2016 jyly batyr babanyń týǵanyna 440 jyl tolýyna baılanysty ortalyq alań salyndy. Balalar men jastar úshin sporttyq alań da umyt qalmady. Qazir aýyldaǵy sharanyń bári osy alańda ótedi. Turǵyndardyń ózderi turatyn kóshelermen qatar osy aýmaqty kórkeıtý, kógaldandyrýǵa úlesi mol. О́tken jyl sońynda oblysta «Úlgili aýyl» baıqaýy ótken bolatyn. Turǵyndardy qorshaǵan ortany qorǵaý men eldi meken damýyna jumyldyrýdy maqsat etken osy baıqaýda aýyl arnaıy nomınasııa alyp, 2 mln teńge ıelendi.
– Jýyrda Parlament Senatynda «Agroónerkásiptik keshendi damytý máseleleri» taqyrybyna arnalǵan Parlamenttik tyńdaýdyń ótkeni oń bastama boldy, – deıdi Qarasheńgel aýyldyq okrýginiń ákimi Orysbek Jamsheıitov. – Bul ulttyń besigi sanalatyn aýyldyń erteńine qatysty mańyzdy sheshimderdi qabyldarda sol eldegilerdiń de pikiri eskeriletinin kórsetti. Shúkir, kóp aýyldan kósh ilgerimiz. Biraq alǵa qoıǵan josparymyz da kóp. Sony júzege asyrýda osy bastamanyń bereri kóp bolady degen oıdamyn.
Sport jaǵynan da «Jalańtós batyr» turǵyndary kóp eldi mekenniń aldynda keledi. Boks, voleıbol, basketbol, fýtbol, jeńil atletıka jarystarynan aýyl jastary júldeli oralyp júr.
QYZYLORDA