Bul týraly Nur-Sýltan qalasy ınvestısııalar jáne kásipkerlikti damytý departamentiniń basshysy Erlan Orynbasaruly málimdedi.
«Karantın rejimi engizilgeli jarty aıdaı ýaqyt ótti. Qalaǵa azyq-túlik taýarlary úzdiksiz jetkizilýde. Júk tasymaly úshin kireberisterde jasyl dáliz jasaqtalǵan. Karantın engizilgen sátten bastap qalaǵa jalpy kólemi 40 myń tonnaǵa jýyqty quraıtyn 3 800 júk kóligi kirdi. Onyń ishinde azyq-túlik kólemi 14 315 tonnany quraıdy. Búginde qalada azyq-túlik qory jetkilikti. Qalada «A» sanatty 5 iri qoıma jáne 7 kókónis qoımasy bar. Olardyń barlyǵynda azyq-túlik qory jetkilikti» dedi ol.
Sondaı-aq ol Memleket basshysynyń «Continental Logistics» JShS-nyń kólik-logıstıka ortalyǵyna baryp, 6 myń tonnadan astam azyq-túlik taýarlary saqtalǵan qoımany aralap kórgenin aıtty.
«Kúni keshe Memleket basshysymen «Continental Logistics» JShS-nyń qoımasynda boldyq, taýar tapshylyǵy baıqalynbaıdy. Tek 19 pazısııadaǵy áleýmettik mańyzy bar azyq-túlik 30myń tonna kóleminde qalada bar. Onyń ishinde 25myń tonna azyq-túlik qoımalarda saqtalýda jáne 5myńǵa jýyq tonna qalalyq turaqtandyrý qorynda. Qala ákimdigi rezervterdi toltyrý boıynsha birqatar sharalar qabyldanýda. Birinshiden, biz óńirlermen jemis-kókónis tobyna, et jáne azyq-túlik ónimderine belgilengen baǵamen «forvardtyq kelisimshart» jasaýdy pysyqtaýdamyz. Ol: Túrkistan, Jambyl, Aqmola jáne Pavlodar oblystary. Ekinshiden, «Aınalym tizbesi» boıynsha kúrish, qaraqumyq jáne kókónis tobyna belgilengen baǵamen satylatyn shartymen iri bólshek saýda jelilerimen jeńildetilgen nesıe týraly kelisimderge qol qoıyldy» dedi Erlan Orynbasaruly.