Elordada vırýsty juqtyrǵandary anyqtalǵan adamdar 222-ge jetti. Olar 2167 adammen baılanysqa túsken. Qazir barlyǵy dárigerlerdiń baqylaýynda. О́kinishke qaraı, 5 adamnyń jaǵdaıy aýyr halde. 28 naýqas syrqattan aıyqty. Bul týraly Nur-Sultan qalalyq qoǵamdyq densaýlyq saqtaý basqarmasynyń bastyǵy Sáýle Qısyqova aıtty.
Sońǵy úsh kúnde bas qalada vırýs juqtyrǵan 3 adam tirkelgen.
– Naýqastardyń deni áıelder, basym kópshiligi 30-43 jas aralyǵyndaǵy azamattar bolyp otyr. Arasynda 30-ǵa tolmaǵan jastar da bar, olar vırýspen kúresýge beıimdi. Qalǵany 50-den asqan kisiler. Kóp jaǵdaıda indet jasy úlkenderge qaýip tóndirýde. Sondyqtan dárigerler kúndiz-túni uıyqtamaı jumys istep jatyr. 10 naýqas Aqmola oblysynyń turǵyny. Qalamyzda 28 qańtardan bastap tumaýǵa qarsy 6315 adam emdeýden ótti. Onyń 202-si áli kámelet jasyna tolmaǵan balalar – dedi S.Qısyqova.
Bir aıta keterligi elordada 31 dáriger Covid-19 juqtyrǵan. Olardyń barlyǵy arnaıy em-dom qabyldap jatyr, jaǵdaılary turaqty. Spıkerdiń aıtýynsha, naýryz aıynda barlyq dárigerge syıaqy túrinde qarjylaı qoldaý kórsetilgen. Olarǵa arnaıy psıhologtar qosymsha qyzmet kórsetýde. Qorǵanysh kostıýmderi tolyqtaı jetkilikti, úsh mezgil tamaq beriledi. Qatynas kólikteri de bar.
Baspasóz maslıhatynda aıtylǵandaı, halyqty sapaly azyq-túlikpen qamtamasyz etý kún tártibinde turǵan basty máseleniń biri. Ásirese, eldegi tótenshe jaǵdaı azyq-túlik qaýipsizdigi salasyna jańasha kózqaras qajet ekenin uqtyrdy. Búginde baǵany turaqtandyrý basty nazarda. Osy oraıda Nur-Sultan qalasy Investısııalar jáne kásipkerlikti damytý departamentiniń basshysy Erlan Bekmurzaev atqarylyp jatqan sharalardy atap ótti.
– Qalaǵa azyq-túlik taýarlary úzdiksiz jetkizilýde. Júk tasymaly úshin qalaǵa kireberiste jasyl dáliz jasaqtalǵan. Karantın engizilgen sátten bastap jalpy kólemi 40 myń tonna quraıtyn 3800 kólik kirdi. Onyń ishinde azyq-túlik ónimderi 14315 tonnany quraıdy. Búginde qalada azyq-túlik qory jetkilikti. Kúni keshe Memleket basshysy Qasym-Jomart Toqaevpen qoımalardy araladyq. Taýar tapshylyǵy baıqalmaıdy. Baǵany turaqtandyrý boıynsha birqatar sharalar qabyldanýda. Biz óńirlermen araǵa jemis jáne et, azyq-túlik ónimderine belgilengen baǵamen forvardtyq kelisimshart jasaýdy pysyqtaýdamyz. Oǵan Jergilikti bıýdjetten qosymsha 1,5 mlrd teńge bólindi. Bul qarjy áleýmettik mańyzy bar azyq-túlik baǵalaryn jeńildetýge arnalǵan nesıege baǵyttalady. Qalada un jetkilikti. Nannyń baǵasy 90 teńgeden aspaýy tıis, – dedi E.Bekmurzaev.
Eskerte keteıik, azyq-túlik baǵasyn kótergen kásipkerlerge aıyppul salynady.