Májilis Tóraǵasy Nurlan Nyǵmatýlınniń jetekshiligimen keshe palatanyń úshinshi parlamenttik sessııadaǵy alǵashqy jalpy otyrysy ótti. Bul joly depýtattar birqatar zań jobalaryna qorytyndy ázirleý mezgilin anyqtap, tıisti komıtetterge bekitip berdi.
Májilis Tóraǵasy Nurlan Nyǵmatýlınniń jetekshiligimen keshe palatanyń úshinshi parlamenttik sessııadaǵy alǵashqy jalpy otyrysy ótti. Bul joly depýtattar birqatar zań jobalaryna qorytyndy ázirleý mezgilin anyqtap, tıisti komıtetterge bekitip berdi.
Olardyń arasynda Memleket basshysy Parlamenttiń úshinshi sessııasynyń ashylýynda basymdyqty qaralýǵa tıis dep tapsyrǵan bir top zań jobasy da bar. Atap aıtqanda, depýtattar nazaryna úshjyldyq bıýdjet jobasy jáne oǵan ilespe zań jobalary usynyldy. «2014 – 2016 jyldarǵa arnalǵan respýblıkalyq bıýdjet týraly» zań jobasy boıynsha qysqasha sıpattama bergen Qarjy jáne bıýdjet komıtetiniń tóraıymy Gúljan Qaraqusova respýblıkalyq bıýdjet parametrleri 2020 jylǵa deıingi respýblıka damýynyń strategııalyq jobasyna sáıkes ázirlenip otyrǵanyn aıtty. Jáne de Prezıdent Joldaýyndaǵy mindettermen de baılanysty ekendigin atap ótti.
Sondaı-aq komıtet tóraıymy «Qazaqstan Respýblıkasynyń Ulttyq qorynan 2014-2016 jyldarǵa arnalǵan kepildik berilgen transfert týraly» zań jobasy týraly da aıtyp ótti. Odan málim bolǵandaı, Ulttyq qordan respýblıkalyq bıýdjetke beriletin kepildik transfert jyl saıyn 1 trıllıon 380 mıllıard teńge bolsa, kelesi jyldyń mólsheri de bıylǵy deńgeıde saqtalyp qalmaq. Depýtattar nazaryna «Respýblıkalyq jáne oblystyq bıýdjetter, respýblıkalyq mańyzy bar qala, astana bıýdjetteri arasyndaǵy 2014-2016 jyldarǵa arnalǵan jalpy sıpattaǵy transfertterdiń kólemi týraly» zań jobasy da usynyldy. Bul rette ákimderdiń qarjylyq áleýetin jáne jaýapkershiligin arttyrý maqsatynda jergilikti bıýdjettiń shyǵys bóligine osy ýaqytqa deıin respýblıkalyq bıýdjettiń maqsatty aǵymdaǵy transfertteri esebinen qarjylandyrylyp kelgen turaqty shyǵyndar tapsyrylǵandyǵyn aıta ketý kerek. Jalpy, bıýdjettik zań jobalaryna qorytyndy ázirleý merzimi ústimizdegi jyldyń 23 qazanyna deıin dep belgilendi. Zań jobalarynyń mańyzyna toqtalǵan Májilis Tóraǵasy Prezıdent tapsyrmasyna sáıkes, Parlament bıýdjetti qaraýda naqty nátıje bolǵandyǵyn kózdeıtindigin jetkizdi.
– Bul jerde másele tek bıýdjet qarjylarynyń ıgerilýinde ǵana emes, bólingen qarjylardyń tıimdiligi men naqty nátıjesinde. Bul Bıýdjet kodeksinde de aıqyn kórsetilgen, – dedi Nurlan Nyǵmatýlın. Spıker osy oraıda, máselen, bilim salasynda úsh aýysymdyq oqýdy qysqartqan kezde, mekteptegi júktemeniń qanshalyqty azaıatyndyǵy, densaýlyq saqtaý salasynda medısınalyq qyzmet sapasynyń artýy, turǵyn úı qurylysynda áleýmettik baspanaǵa kezektiń qanshalyqty qysqaratyndyǵy basty nazarda bolýǵa tıistigin erekshe atady. «Memleket qarjysy jumsalatyn istiń barlyǵynda naqty nátıje kerek. Parlamentte bıýdjetti qaraýda budan basqasha bolýy da múmkin emes», dep qorytty sózin spıker.
Keshegi otyrysta sondaı-aq «Qazaqstan Respýblıkasyndaǵy «Saılaý týraly» konstıtýsııalyq zań jobasy ilespe túzetýlerimen birge zańnamalyq aınalymǵa alyndy. Sonymen qatar, palata «Qazaqstan men Qytaı arasyndaǵy «Qazaqstan-Qytaı» munaı qubyryn damytý jáne paıdalaný kezindegi yntymaqtastyqtyń keıbir máseleleri týraly kelisimdi ratıfıkasııalaý týraly» zań jobasyn óndiriske qabyldady. Májilistiń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev munaıǵa qatysty qujattyń negizgi maqsaty qazaqstandyq munaıdyń turaqty túrde jáne jylyna 20 mıllıon tonna jetkizilip turýyn qamtamasyz etý, sonymen birge, Qytaı baǵytyna munaı jetkizýde qazaqstandyq júk tasymaldaýdyń barlyq jaǵdaıyn jasaýdy qarastyrý ekendigin atap kórsetti.
Palata «Innovasııalyq tehnologııalar parki» ınnovasııalyq klasteri týraly» zań jobasyn qaraýǵa aldy. Zań jobasynyń qabyldanýy Park aýmaǵynda ǵylym jańalyqtarynyń generasııasy úshin jaǵdaı jasaıdy jáne onyń kommersııalyq túrde iske asýyna jaǵdaı týǵyzady dep kútilýde. Sonymen birge, zańdyq qujat «Innovasııalyq tehnologııalar parki» ınnovasııalyq klasteri mártebesiniń quqyn jáne «Innovasııalyq tehnologııalar parkiniń» ekonomıkalyq aýmaǵyn basqarýdyń erekshelikterin aıqyndaıtyn bolady. Jáne de ınnovasııal yq tehnologııalar qorynyń jeke klasteriniń sheteldik jumys kúshin tartýdaǵy erekshelikterin bekitedi. Sáýlet, qala qurylysy jáne qurylys qyzmeti máseleleri boıynsha ózgerister men tolyqtyrýlar engizý týraly zań jobalary da qaraýǵa alyndy.
Asqar TURAPBAIULY,
«Egemen Qazaqstan».