Almatyda koronavırýs juqtyrǵan azamattarǵa arnalǵan aýrýhananyń qurylysy bastaldy. Aıtýly jobany júzege asyrý osy salada mol tájirıbesi bar otandyq BI Group holdıngine júkteldi.
Keshe BI Group holdınginiń qyzmetkerleri qurylys júrip jatqan jerge bir top BAQ ókilderin aparyp, ózderiniń jumystarymen jan-jaqty tanystyrdy. 1,9 gektardy alyp jatqan aýrýhana qazirgi kezde 280 adamǵa eseptelip otyr. Al qajettilik týyndaǵan jaǵdaıda onyń syıymdylyǵyn tez arada eki esege deıin arttyrýǵa bolady. Bul medısınalyq mekemede karantınge arnalǵan, qarqyndy terapııa, jansaqtaý bólimderi qarastyrylǵan. Olardyń jeke bıohımııalyq zerthanalary, rentgen bólimderi jáne kompıýterlik tomografııasy bolady. Palatalarda teris qysymdy qamtamasyz etetin arnaıy jeldetkish júıe ornatylady. Osy arqyly medısına qyzmetkerlerine tónetin qaýipti edáýir tómendetýge bolady.
- Kúlli álemdi koronavırýs indeti sharlap, halyqqa qaýip tónip otyrǵan kezde BI Group holdıngi osyndaı ıgi sharany júzege asyrýdy qup kórdi. Bul rette biz paıda kórýdi oılap otyrǵan joqpyz. Eń bastysy – halyqtyń amandyǵy men saýlyǵy. Odan qundy esh nárse joq. О́zimizge qandaı jaýapkershiliktiń júktelgenin de barlyǵymyz anyq sezinip otyrmyz. Sondyqtan da qurylys jumystaryn qarqyndy túrde bastap kettik. Buıyrtsa, 25 sáýirge deıin bul nysan boı kóteredi, - deıdi BI Group AImaty kompanııasynyń dırektory Aıdos Muqataev.
Qazirgi kezde aýrýhananyń qurylysyna 250 adam tartylyp, olar kúndiz-túni tapjylmaı eńbektenýde. Sonyń nátıjesinde qazý jumystary aıaqtalyp, irgetastardy da ornatyp úlgergen eken. Taǵy bir aıta keterlik jaıt, ózge memlekettermen salystyrǵanda, Almaty, Nur-Sultan jáne Shymkent qalalarynda salynyp jatqan aýrýhanalar uzaq merzimge eseptelinip otyr. Iаǵnı, koronavırýs indeti seıilgennen keıin de bul nysandar túrli baǵyt boıynsha jumys isteı beredi.