Memleket basshysy Qasym-Jomart Toqaevtyń «Jumyspen qamtýdyń jol kartasy» boıynsha bıýjetten 1 trln teńge bólý týraly sheshimi elimizde jańadan jumys oryndaryn ashýǵa serpin beredi.
Osy maqsatta bir ǵana Almaty oblysynda 22,8 myń adamǵa jumys isteýge múmkindik beretin 977 joba júzege aspaq. Buǵan 109,2 mlrd teńge bólingen. Qazir memlekettik saraptama qorytyndysynan ótken jobalyq-smetalyq qujattama arqyly óńir turǵyndary tabysty jumys ornynan úmitti. Jalpy, jumys oryndaryn ashý tek bıýdjet qarjysy esebinen ǵana júzege asyp jatqan joq. Jeke ınvestorlar ashqan ónidiris oryndarynda da jumys kúshine suranys bar. Mysaly, jekemenshik ınvestısııalar esebinen 367,6 mlrd teńge jumsalǵan 75 nysan iske qosylǵan. Nátıjesinde, 5 myńnan astam jumys oryny ashylady. Atap aıtqanda, Sıngapýr memleketiniń ınvestısııasyna salynyp jatqan Alacem zaýyty, Birikken Arab Ámirliginiń qarjysyna ashylatyn Phoenix feed mills kompanııasy, nıderlandtyqtar qolǵa alǵan STK Sokol jobasy jáne kórshiles Qytaı ınvestorlary iske qosatyn Mistral energy kompanııasynyń óndiris oryndary jumys kúshine degen suranysty ósiredi degen boljam bar.
Aıtpaqshy, tótenshe jaǵdaı jarııalanǵan merzim aralyǵynda oblystaǵy 48 iri kásiporyn men 158 orta óndiris nysandarynda óndiris kólemi azaıyp, sonyń saldarynan qyzmetkerlerdi qysqartý men aqysyz demalysqa jiberý deregi tirkelmepti. Iаǵnı, bul salada jumys istep júrgen 156 myń adam óz mindetterin tolyq atqaryp, eńbekaqysyn alyp otyr.
– Oblysta buryn da jol kartasy boıynsha jumystar atqaryldy, biraq mundaı kólemde qarajat alǵash ret bólinip otyr. Sondyqtan biz qarajatty ýaqytynda jáne sapaly ıgerýge jáne turǵyndardy jumyspen qamtý máselesin sheshýge mindettimiz. Josparǵa sáıkes «Eńbek» baǵdarlamasy boıynsha 22 myń adamdy jumyspen qamtýdyń belsendi sharasy jasaldy, – deıdi oblys ákimi Amandyq Batalov.
Jalpy, Almaty oblysynda «Jumyspen qamtýdyń jol kartasy» aıasynda bólingen qarajattyń 54 paıyzy óńirdegi áleýmettik-mádenı salanyń máselesin sheshýge baǵyttalmaq. Máselen, osy qarjyǵa óńirdegi mektep jetispeýshiligin joıýdyń sátti múmkindigi týatyn sııaqty. О́ıtkeni, aımaq boıynsha salynyp jatqan 16 mektepke qosymsha taǵy 7 mekteptiń qurylysy bastalmaq. Bul qosymsha 10,2 myń balany orynmen qamtymaq. Al «Jumyspen qamtýdyń jol kartasy» aıasynda bólingen qarajatty tıimdi ıgergen jaǵdaıda bıyl Jetisýda 23 mektepti iske qosýǵa bolady eken. Al bul úsh aýysymdy mektep sanyn azaıtýǵa jol ashpaq. Qazir oblysta 32 úsh aýysymdy mektep bar.
Sondaı-aq bólingen qarjy mektep qurylysynan bólek jergilikti jerdegi medısına mekemelerin de jańa ǵımaratpen qamtýǵa múmkindik bermek. Búginde oblystaǵy 5 aýylda dárigerlik ambýlatorııa salý josparlanypty. Sondaı-aq Jumyspen qamtýdyń jol kartasy aıasynda óńirdegi 53 eldi mekenniń sýmen jabdyqtaý nysandary qaıta jańartylyp, jóndelmek. Taǵy 84 eldi mekende abattandyrý júrgizip, 220 eldi mekenniń 500 shaqyrym jolyn jasaý da osy qarajattyń esebinen josparlanǵan.
Almaty oblysy