Erejesiz jekpe-jek álemindegi eń beldi uıym – UFC-diń bıylǵy jyly josparlanyp otyrǵan jarystary ótpeı qalsa, onda olardyń shyǵyny 750 mıllıon AQSh dollarynan asýy múmkin.
Jyl basynan beri aıtýly promoýshen jeti jarys uıymdastyryp úlgergerdi. Odan keıin kúlli álemdi koronavırýs indeti jaılady. «Baıtal turmaq, as qaıǵy» kezde kóptegen memlekette sporttyq saıystar tegisteı toqtatyldy. Máselen, UFC uıymy 18 sáýirde AQSh-tyń Nıý-Iork qalasynda reseılik Habıb Nurmagomedov pen amerıkalyq Tonı Fergıýson arasynda tıtýlyq kezdesý ótkizýdi kózdedi. Biraq koronavırýsten qaýiptendi me, álde basqa da sebepteri boly ma, áıteýir Daǵystannyń óreni Amerıkaǵa barýdan bas tartty. Keıinnen Reseı ókilin AQSh-tyń dúleıi Djastın Getjı almastyrdy. Al UFC-diń prezıdenti Dana Ýaıt «qandaı jaǵdaı bolsa da, dál sol belgilengen kúni aıtýly jarysty uıymdastyramyn» dep aıtqanynan qaıtpaı otyr.
Jalpy UFC bıylǵy jyldyń sońyna deıin 42 týrnır uıymdastyrýdy aldyn-ala josparlap qoıǵan. Olardyń ESPN arnasymen jasasqan kelisimsharty bar. Biraq koronavırýs indeti áli de álemde seıilmeı tur. Al ondaı jaǵdaıda jarystar ótkizýge ruqsat berilmeıdi. Bir sózben aıtsaq, ústimizdegi jyly UFC-diń shyǵynǵa belshesinen batatyny anyq.