Premer-Mınıstr Asqar Mamın Eýrazııalyq úkimetaralyq keńestiń (EÚAK) otyrysyna beınekonferensııa baılanysy rejiminde qatysty. Bul týraly Premer-Mınıstrdiń baspasóz qyzmeti habarlady.
Qazaqstan Úkimetiniń basshysy Qazaqstannyń COVID-19 taralýymen kúresý, ekonomıkany turaqtandyrý, turǵyndar men bıznesti qoldaý boıynsha qabyldap jatqan sharalary týraly aıtyp berdi. Bul rette ulttyq ekonomıkalar deńgeıinde ǵana emes, Eýrazııalyq ekonomıkalyq odaq (EAEO) aıasynda da daǵdarysqa qarsy sharalardy odan ári qabyldaý qajettigin atap ótti.
Premer-Mınıstr AО́K ónimderi men birinshi qajettiliktegi taýarlar ımportyn almastyrý jáne azyq-túlikpen ózin-ózi tolyq qamtamasyz etý arqyly EAEO-nyń ózin-ózi qamtýyn kúsheıtýi qajettigin atap ótti.
Úkimet basshysy EAEO-ǵa qatysýshy elderdiń ekonomıkalarynyń qazirgi jáne áleýetti básekeli artyqshylyqtarynyń negizinde óndiristik prosesterdi óńirlendirýdiń, Ońtústik-Shyǵys Azııa, Qytaı jáne basqa aımaqtardan kóshiriletin óndiristik aktıvterdi tartý boıynsha birlesken tásilderdi ázirleýdiń, jańa ótkizý naryqtarymen baılanysty qalyptastyrýdyń, sıfrlyq tehnologııalar men jasandy zerdeni qarqyndy túrde damytý úshin qolaıly jaǵdaılardy belsendi qalyptastyrýdyń mańyzdylyǵyn atap ótti.
«EAEO uzaq merzimdi turaqtylyǵy saýda úrdisteriniń turaqtylyǵyna tikeleı baılanysty. Osyǵan baılanysty bizge odaq aıasynda jasalatyn taýarlar men qyzmetterdiń basymdyǵyn eskerýmen aımaqtyq saýda-sattyqtaǵy tásilderdi birlesip qaıta qarastyrý qajet», — dedi A. Mamın.
Premer-Mınıstr ózara saýdadaǵy kedergilerdi júıeleý jáne odan ári joıý boıynsha birlesken jumysty kúsheıtý qajet ekenin atap ótti.
«Qazirgi ekonomıkalyq daǵdarys bizdiń ekonomıkalarymyz úshin syn-tegeýrin ǵana emes, múmkindik te bolyp otyr. EAEO aıasyndaǵy birlesken jumys daǵdarys saldaryn jumsartýǵa ǵana emes, EAEO aıasynda qurylatyn baǵanyń uzaqmerzimdi ósýi men básekege qabilettiligin damytýdyń irgeli faktorlaryn qalyptastyrý úshin jaǵdaılar jasaýǵa múmkindik beredi», — dedi A. Mamın.
Sonymen qatar, otyrysqa Reseı Federasııasynyń Premer-Mınıstri Mıhaıl Mıshýstın, Belarýs Premer-Mınıstri Sergeı Rýmas, Moldova Premer-Mınıstri Ion Kıký, Qyrǵyzstan Premer-Mınıstri Mýhammedkalyı Abylgazıev, Armenııa Respýblıkasynyń Premer-Mınıstri Nıkol Pashınıan jáne Eýrazııalyq ekonomıkalyq komıssııa alqasynyń tóraǵasy Mıhaıl Mıasnıkovıch qatysty.
Otyrysqa qatysýshylar Eýrazııalyq ekonomıkalyq ıntegrasııany damytýdyń 2025 jylǵa deıingi strategııalyq baǵyttary jobasyn daıyndaý boıynsha jumys barysyn, arnaıy qorǵaý, dempıngke qarsy jáne ótemdik sharalardy qoldaný tetikterin jetildirý, elektrondyq saýdany damytý, ulttyq aqparattyq júıelerdi jedel ıntegrasııalaý jáne basqa da máselelerdi qarady.
Taraptar EAEO múshe memleketterdiń aýmaǵyndaǵy tez buzylatyn ónimder eksportyn rásimdeýdi taýardyń shyǵýynyń serııalyq sertıfıkaty júıesin engizý arqyly jeńildetý týraly kelisimge keldi. Bul shara EAEO elderinde taýarlardyń shyqqan jerin rastaıtyn qujattardy alýǵa jumsalatyn ýaqyt jáne materıaldyq shyǵyndardy azaıtýǵa múmkindik beredi. “Serııalyq” ónimniń shyqqan jeri týraly sertıfıkat birtekti, serııamen shyǵarylatyn ónimderge 6 aı merzimge bir ret berile alady.
EÚAK otyrysynyń qorytyndysy boıynsha COVID-19 pandemııasy jaǵdaıynda ekonomıkalyq turaqtylyqty qamtamasyz etý jónindegi EAEO sharalaryn qosa alǵanda, birqatar sheshimder, tapsyrmalar jáne ókimder qabyldandy.
Qujat turǵyndardyń sanıtarlyq-epıdemıologııalyq qolaılylyǵy salasynda ókiletti organdardyń ózara is-qımylyn kúsheıtýdi, kedendik tasymaldaý bajdarynyń mólsherlemelerin ýaqytsha eseptemeý jáne kedendik rásimderdi ońaılatý jolymen áleýmettik mańyzy bar taýarlardyń ımporty úshin «jasyl dáliz» qurýdy, úshinshi elderge asa mańyzdy taýarlardyń eksportyna biryńǵaı ýaqytsha shekteýler engizýdi, saýdany jáne qolma-qol aqshasyz tólemderdi sıfrlandyrýdy yntalandyrýdy, vırýsqa qarsy preparattar men vaksınalar jasaý, olardyń jappaı óndirisin jolǵa qoıý jónindegi birlesken is-sharalardy jáne basqa da sharalardy qarastyrady.