Qyzylorda oblysynda bir táýlik ishinde taǵy 12 adamnyń vırýs juqtyrǵany belgili bolyp otyr. Bul týraly búgin óńirlik kommýnıkasııa alańyndaǵy brıfıngte oblystyq densaýlyq saqtaý basqarmasynyń basshysy Jaqsylyq Ábdisámetov habarlady.
– Jańadan anyqtalǵan jaǵdaıdyń 9-y Syrdarııa aýdanyndaǵy Amangeldi aýylynan baıqalyp otyr. Taǵy eki naýqas Aral aýdanynan shyqty. Bular buryn indetke shaldyqqandarmen qarym-qatynasta bolǵandar. Osyǵan deıin indetten irgesin aýlaq salyp kelgen Qazaly aýdanynda alǵashqy oqıǵa tirkeldi. Maıdakól aýylynan anyqtalǵan adam Nur-Sultan qalasynan kelgen. Bul jańadan tabylǵan ınfeksııa oshaǵy, – deıdi oblystyń bas dárigeri.
Búgingi kúnge oblys boıynsha vırýs juqtyrǵandar sany 116-ǵa jetti. Olarmen baılanysty bolǵan 1227 turǵyn anyqtaldy. Bas dárigerdiń aıtýynsha Syrdarııa aýdanyndaǵy naýqastar kóp tirkelgen Amangeldi aýyly qazir karantınge jabylǵan.