Aınalańa jaqsylyq jasaý, meıirim-shapaǵatyńdy tógý degen sózderdiń maǵynasy mindetti túrde bireýge qarjylaı kómek qolyn sozý, turmystyq deńgeıi tómen otbasylarǵa járdemdesý sııaqty tek materıaldyq jaǵdaıǵa qatysty aıtylatyn ıgilikti ispen shektelmeıdi, sonymen qatar ol – kisiniń kóńil-kúıine shýaq sebelep, jan-dúnıesine áser etetin rýhanı baılyqpen de tyǵyz baılanysty aýqymy keń aıshyqty uǵym.
Osyndaıda Kákimbek Salyqovtyń bar qazaqqa áıgili «Bir aýyz sóz qasiretti tııady, Bir aýyz sóz aıyqpas dert jııady» dep keletin óleń joldary oıǵa oralady. Mán bersek, bir aýyz jyly sózdiń ózi jigeri muqalǵan janǵa demeý, aıaǵynan tik turyp ketýine orasan zor medet eken. Kisiniń qaıǵy-qasiretin jeńildetip, jaqsylyq jasaýǵa qulshynyp turatyn, júreginiń shyraǵy bar jandardyń árbir jaqsy áreketin áldeneni sebep etpeı-aq, jan qalaýymen adal atqarýǵa daıyn turatyny erteńgi tańymyzdyń jarqyrap ataryna sekemsiz sendiredi. О́zińdi qorshaǵan álemge, qoǵamǵa paıdańdy tıgizý degendi kúndelikti ómiriniń basty qaǵıdatyna aınaldyrǵan mundaı tulǵalar bireýdi qýantpaı, shattyqqa bólemeı tura almaıdy.
Nur-Sultan qalasynyń turǵyny Nıethan Batyrhanuly esimdi azamattyń karantınde qarap jatpaı, kartına salǵanyn áleýmettik jeliden kózimiz shalyp qaldy. Árıne shyǵarmashylyq adamynyń qııal ushyndaǵy san-sapat beınelerdi úıinde jatyp-aq tirilte berýi zańdy qubylys bolýy múmkin. Biraq bizdiń áńgimege arqaý etip otyrǵan keıipkerimizdiń óneri ózge áriptesterine qaraǵanda jurtshylyqqa ózgeshe áser qaldyrady. «Aksıoma» turǵyn úı kesheninde turatyn áýesqoı sýretshi óz páteri ornalasqan toǵyzynshy qabattyń kireberis qabyrǵasyna barelef úlgisimen «Meniń aýlam» kompozısııasyn saldy.
–Aýyldaǵy alma baǵyna degen saǵynyshtan osy ıdeıa týdy. Ýyljyp pisken jemistiń dámi til úıiretin. Biz ony óte jaqsy kóretinbiz, almanyń ıisinen, dámi men shyrynynan lázzat alatynbyz. Sondyqtan men osy jemis aǵashynyń sýreti arqyly kórshilerime qýanysh syılaǵym keldi. О́ıtkeni máýeli aǵashqa qaraǵan adamnyń jany kóktemniń kúnindeı jadyrap, meıirim-shapaǵatqa bólenedi, gúlge oranǵan aýyldaǵy alma baǵyn aralap júrgendeı keremet kúı keshedi, ýaqyt keńistigine saıahat jasaıdy. Ulym Álibı ekeýmiz eki jaqtap qolǵa alǵan isti az ýaqytta aıaqtap shyqtyq. Alaıda munymen toqtap qalmaımyz. Qazir taǵy bir tyń týyndyny salýǵa kiristim, – deıdi avtor bizben áńgimesinde.
Qabyrǵaǵa alǵash ret sýret salǵan qylqalam ıesiniń kireberiske ilingen basqa týyndylary da tylsym syrymen, boıaý-bederimen erekshe kóz tartady. Alýan aıshyqty peızajdar tabıǵat-ana bolmysynan qapysyz syr shertedi. Másele tabıǵatqa qarap otyryp, aınytpaı sýret salýda emes, onyń maǵynasyn ashyp, oı men sezimdi, kóńil-kúıdi bere bilýde desek, taý men dala tabıǵatyn sıpattaıtyn týyndylardan sýretshiniń ómir aǵysyn ózgeshe órnekteıtin qoltańbasyn ańǵarý qıyn emes. Muny ol keleshekte týǵan jerdiń baı tabıǵatyn, keń baıtaq Qazaqstannyń taýly, sýly, shóldi, ormandy alqaptaryn qatar qamtıtyn «Meniń elim» atty serııaly toptamaǵa aınaldyrǵysy keletinin tilge tıek etti. Ár shyǵarmanyń dúnıege kelýi, kóńil-kúıge áseri qaıtalanbaıdy. Mysaly, týǵan jerge saǵynyshtan týǵan «О́zen» kartınasy ózi týyp-ósken Shý ózeni boıyndaǵy keń jaılaýdyń tynys-tirshiligin bederlese, «Taý», «Shól dalada» atty kartınalary týǵan ólkemizdiń baı tabıǵatyna baıyppen ertedi.
Avtor týraly az-kem maǵlumat bere ketsek, Nıethan Kenjebekov Jezqazǵan pedınstıtýtynyń syzý jáne beıneleý óneri fakýltetin oqyp bitirgen. Eńbek jolyn mektepte muǵalim bolyp bastaǵan, keıin ishki ister salasynda abyroıly qyzmet atqarǵan. Zeınet demalysyna 2008 jyly shyqqan azamat: «Qazir qol qýsyryp qarap jatatyn zaman emes, ózimniń jeke bıznesim bar, Nur-Sultan qalasynda páterlerdi jalǵa ótkizýmen aınalysamyn. Qolym qalt etkende sýret salamyn, óleń jazamyn. Bul óner maǵan anamnyń aq sútimen daryǵan bolsa kerek. О́ıtkeni anam qazaqtyń kıiz úıiniń áshekeı-buıymdaryn minsiz toqıtyn qoly gúl, naǵyz sheber kisi edi» deıdi Nıethan Batyrhanuly.
«Jaqsy kórshi tapqanyń – kóp oljaǵa batqanyń» degen qanatty sózdi atam qazaq beker aıtqan ba? Karantınde kórshi-qolańyna alma aǵashyn syılap, tamasha tartýymen qýantqan osy azamattyń is-áreketi tasty jaryp shyqqan taý gúlindeı jan baýraıdy. Bulttyń arasynan jyltyraǵan jaryq sáýlege uqsaıdy.
Sýretterde: Nıethan Batyrhanulynyń peızajdary